Túrkistan saıabaǵynda úsh jetkinshek oryndyqtar men qoqys jáshigin syndyrǵan
TÚRKІSTAN. QazAqparat- Túrkistanda úsh jasóspirim qyzyq úshin saıabaqtaǵy qoqys jáshigi men 3 oryndyqty syndyryp ketken, dep habarlaıdy QazAqparat tilshisi.
Quqyq buzýshy jetkinshekter tańǵy 04:55 shamasynda qydyryp júrip, qyzyq úshin óreskel áreketke barǵan.
Qazirgi tańda atalǵan jaıt boıynsha QR QK 202-babymen («bótenniń múlkin qasaqana joıý nemese búldirý») sotqa deıingi tergeý amaldary júrgizilip jatyr.
«Bul jaǵdaı boıynsha Túrkistan qalalyq polıtsııa basqarmasyna «Jasyl Túrkistan» mekemesiniń qyzmetkerleri shaǵymdanǵan. Aqparat alysymen polıtseıler shuǵyl áreket etti. Jedel-izdestirý sharalary atqaryldy. Beınebaqylaý kameralary jiti tekserildi. Sonyń nátıjesinde saıabaqta teris áreket jasaǵandardyń áreketi jazylǵan beınejazba tabyldy»,-deıdi Túrkistan oblysy polıtsııa departamentiniń baspasóz hatshysy Gúlnar Ábdijapparova.
