«Túrkistan - Samarqand» turaqty halyqaralyq avtobýs baǵdary ashylady
TÚRKІSTAN. QazAqparat - Túrkistan qalasynyń Ózbekstannyń Samarqand qalasymen saýda-ekonomıkalyq jáne týrıstik áleýetin nyǵaıtý maqsatynda, aǵymdaǵy jyldyń 1-shi toqsanynda «Túrkistan - Samarqand» turaqty halyqaralyq avtobýs baǵdaryn ashý josparlanyp otyr. Bul týraly búgin Túrkistan oblystyq jolaýshylar kóligi jáne avtomobıl joldary basqarmasynyń basshysy Bekzat Tilegenov málim etti, dep habarlaıdy QazAqparat tilshisi.
Bekzat Tilegenovtiń aıtýynsha, óńirde 44 tasymaldaýshy 1224 avtobýspen (shaǵyn avtobýspen) jolaýshylarǵa qyzmet kórsetýde.
«Oblystaǵy turaqty baǵyttar jelisi - 325 baǵyttaǵy 1090 kesteden turady. Oblys boıynsha 2018 jyly 797 mln jolaýshy tasymaldanǵan. Al, bıylǵy jyly 865 mln jolaýshy tasymaldanady dep kútilýde. Budan ózge aımaqtaǵy jolaýshylar kóliginde 18 turaqty baǵyt ashylǵan. Sondaı-aq, 2019 jyldyń 1 qańtarynda áleýmettik mańyzy bar «Túrkistan - Badam» jáne «Túrkistan - Saryaǵash» temirjol baǵyttary ashyldy. Poıyzdar aptasyna 5 retten qatynaıdy. Bılet quny «Túrkistan - Badam» - 609 teńge, «Túrkistan - Saryaǵash» - 1114 teńge»,- deıdi basqarma basshysy.
