Túrkistan: Prezıdent Joldaýyna oblys ardagerleri qoldaý bildirdi

TÚRKІSTAN. QazAqparat - Búgin Túrkistanda Memleket basshysynyń «Halyq birligi jáne júıeli reformalar-el órkendeýiniń berik negizi» atty kezekti Joldaýyn talqylaýǵa arnalǵan oblystyq ardagerler keńesiniń keńeıtilgen tóralqa májilisi bolyp ótti, dep habarlaıdy QazAqparat oblys ákiminiń baspasóz qyzmetine silteme jasap.

Jıynǵa oblystyq ardagerler keńesiniń tóraǵasy Jeńisbek Máýlenqulov, oblys ákimi apparaty qoǵamdyq-saıası sala monıtorıngi bóliminiń basshysy Samat Rasýl, oblystyq qoǵamdyq damý basqarmasy basshysynyń mindetin atqarýshy Dáýren Sarıev jáne onlaın rejımde zııaly qaýym ókilderi, aýdandyq, qalalyq ardagerler uıymdary men ákeler mektebiniń tóraǵalary, ájeler alqasynyń tóraıymdary, aýdan, qala ákimderiniń orynbasarlary men ishki saıasat bóliminiń basshylary qatysty.

Jıyndy ashyp, júrgizip otyrǵan oblystyq ardagerler keńesiniń tóraǵasy Jeńisbek Máýlenqulov sharanyń kún tártibin baıandap, Joldaýdaǵy mańyzdy máseleler men aıqyn erekshelikterdi atap ótti.

«Joldaý eldiń ishki jáne syrtqy jaǵdaılaryna baılanysty Prezıdenttiń toptasýdaǵy tıimdi sharasy. Joldaý arqyly árbir azamat eldiń damý baǵyttary men múmkindikterimen tanysa otyryp, bolashaqtaǵy jumystaryna osy qujatty negizgi baǵdarsham etedi. Bizdińshe, bıylǵy Joldaýdyń burynǵylarmen salystyrmaly túrde birneshe ereksheligi bar ekenin aıta ketken jón. Biz óz kezegimizde Joldaýdyń júzege asýyna úlesterimizdi qosa alatynymyzǵa bek senimdimin. Bul oraıda aǵa býyn ardagerler qaı kezeńde de qoǵam men memleket aldynda turǵan mindetterdi aqylmen, sabyrmen, ǵylymı naqtylyqpen atqarýǵa muryndyq bolatyn qoǵamnyń zııaly qaýymymen birlese jumystar atqarýǵa qashan da daıyn», dedi Jeńisbek Máýlenqulov.

Sonymen qatar, jıynda jazýshy, «Alash» syılyǵynyń ıegeri, oblystyq ardagerler keńesiniń pleným múshesi Marhabat Baıǵut, alqa múshesi, oblystyq ardagerler keńesi tóraǵasynyń birinshi orynbasary Ábdishúkir Saparbekov, Saryaǵash aýdandyq ardagerler keńesiniń tóraǵasy Mustapa Súleımenov, Qazyǵurt aýdandyq ájeler tóraıymy Baǵıla Ismaıl, Shardara aýdandyq ardagerler keńesiniń tóraǵasy Toqsanbaı Berdibekovter sóz alyp, Joldaý aıasyndaǵy atqarylar jumystarǵa óz usynystaryn aıtyp, pikirlerin ortaǵa saldy.

Jıyn sońynda Jeńisbek Máýlenqulov Prezıdent Joldaýyna qatysty arnaıy qaýlymen tanystyryp, alqa músheleri tarapynan biraýyzdan maquldanyp, bekitildi.