Túrkistan polıtsııasynda kúmis alqaly batyr ana qyzmet etedi
NUR-SULTAN. QazAqparat - Túrkistan polıtsııasynda moınyna kúmis alqa taqqan batyr ana qyzmet etedi, dep habarlaıdy Polisia.kz.
Túrkistan oblysy polıtsııa departamenti Keles aýdany polıtsııa bóliminiń kóshi-qon qyzmet tobynda aǵa ınspektor, polıtsııa maıory Gúljan Quralbekova qyzmet etedi.
Gúljan 1979 jyly 22 jeltoqsanda Túrkistan oblysy Saryaǵash qalasynda dúnıege kelgen.
Kishkentaıynan alǵyrlyǵymen kózge túsip, zerektigimen daralanyp ósken qyzdyń mekteptegi oqý úlgerimi óte jaqsy boldy.
Qaı salaǵa bolsa da ıkemi bar boıjetken ekonomıka salasyna qyzyǵýshylyq tanytyp, Saryaǵash qalasyndaǵy aýylsharýashylyq kolledjine oqýǵa túsedi.
Bala kezgi qalpynan tanbaı, óziniń oqý ozaty degen dárejesin tómendetpeı, 18 jasynda ekonomıst-býhgalter mamandyǵyn qyzyl dıplommen támamdady. Ári qaraı mamandyǵy boıynsha túrli mekemelerde hatshylyq qyzmet atqaryp, jaqsy kórsetkishterge qol jetkizdi.
Alaıda onyń alǵa qurǵan jospary múlde basqa bolatyn. Gúljan ózin polıtseı formasynda jıi elestetetin jáne armandaıtyn.
Sodan 2002 jyly bul armany túbegeıli ómirlik maqsatyna aınalyp, Aqtóbe qalasyna oqýǵa tústi.
Qandaı jumys bolsyn, qandaı sala bolsyn dóńgeletip áketýge daǵdylanǵan úzdik jas maman Aqtóbe zań kolledjin de qyzyl dıplommen sátti aıaqtady.
Sonymen eki jyldyq oqýdan soń týǵan jerine qaıta oralyp, ıývenaldy polıtsııa tobynyń kámeletke tolmaǵandar isteri jónindegi ınspektory bolyp ishki ister salasyndaǵy alǵashqy qyzmetin bastady.
Jumysyna jaýapty, ár isine tııanaqty bola bilgen jas polıtseı kóp uzamaı kóshi-qon polıtsııa bólimshesiniń ınspektory laýazymyna taǵaıyndaldy.
Oqýda ozat bolyp, jaqsy nátıje kórsetken Gúljan qyzmette de tek úzdikter qatarynan kórindi. Osy qyzmette júrip ómirlik serigin taýyp, turmys qurdy.
Dástúr jolymen óziniń mindetinde adal atqaryp, qazir de sol áýlettiń shańyraǵyn shaıqaltpaı, tútinin tútep otyr.
Saryaǵash qalasynda 17 jyl boıy abyroıly qyzmet atqarǵan bilikti maman 2021 jyldan beri Keles aýdany polıtsııa bólimi kóshi-qon qyzmet tobynyń aǵa ınspektory laýazymynda keleli ister tyndyryp júr.
Elimizdiń kóshi-qon qyzmetiniń turaqty damýyna at salysyp júrgen qyzmetkerimiz demografııa salasynyń órkendeýine de zor úles qosýda.
Qazirgi tańda ıyǵyna maıor shenin, moınyna kúmis alqa taqqan batyr ana eki ul men tórt qyzdy mápelep ósirip otyr.
Búldirshinderin aınalyp-tolǵanyp, solardyń bolashaǵy úshin aıanbaı ter tógip, qolynan kelgenin jasap baǵýda.
– Kóktemmen birge jylýlyǵy men sulýlyǵyn ala kelgen áıelder merekesine oraı analar qaýymyna aıtar alǵysym sheksiz. Olardyń árbir kórgen beınetiniń zeınetin kórgenin qalaımyn. Buǵan qosa polıtsııa salasyndaǵy barsha názik jandylarǵa kóterińki kóńil-kúı, eńbekterine bereke, januıalaryna baqyt tileımin. Qazaqstandyqtardyń qaýipsiz qoǵamda ómir súrýi úshin olardyń qosqan úlesi orasan zor. Elimiz tynysh bolyp, bolashaǵamyz qoı ústine boztorǵaı jumyrtqalaǵan zaman bolsyn, – dep óziniń ystyq lebizin jetkizdi batyr ana.
