Túrkistan ortaazııalyq stıldegi qalaǵa aınalady
TÚRKІSTAN. QazAqparat - Túrkistan qalasy aldaǵy ýaqytta ortaazııalyq stılde, ıaǵnı kóne dáýirdegi sáýletpen damıtyn bolady. Qala qurylysy men sáýleti úsh baǵytta júrgiziledi. Bul týraly Túrkistan oblysynyń óńirlik kommýnıkatsııalar qyzmetinde ótken brıfıngte qala ákimi Álipbek Óserbaev aıtty, dep habarlaıdy QazAqparat tilshisi.
Shahardyń bolashaq kelbeti týraly da baıandaǵan Álipbek Óserbaev úsh baǵytty da atap ketti. Onyń sózinshe, birinshi baǵyt «Tarıhı aımaq» dep atalady. Oǵan sáıkes, Qoja Ahmet ıAsaýı kesenesi ornalasqan tarıhı aımaqtaǵy 88,7 gektar jerge ornalasqan 18 nysandy restavratsııalaý kózdelgen. Al, «ekinshi baǵyt rýhanı-mádenı ortalyq» aımaǵy 98 gektar jerge josparlanyp otyr. Úshinshisi ákimshilik-iskerlik ortalyǵynyń aımaǵy 700 gektardy quraıdy. Onda oblystyq ákimdik ǵımaratynan bastap, basqarmalar men departamentter ǵımaraty, Medıa ortalyq, Saýda ortalyqtary men turǵyn úı keshenderi, jastar men oqýshylar saraıy, sport, mádenı keshenderdiń qurylysy túsedi dep kútilýde. Shahar basshysy sondaı-aq, qalanyń áleýmettik-ekonomıkalyq jaǵyna da toqtalyp ketti.
Ákimniń málimetinshe, qala halqynyń 94,1 paıyzy taza aýyz sýmen qamtamasyz etilgen. Al, sapaly elektr energııasymen qamtý kórsetkishi 99,8 paıyzǵa jetken. Qazirgi tańda, kommýnaldyq qyzmetpen tolyq qamtý maqsatynda tıisti jumystar atqarylýda.
«Túrkistan qalasyndaǵy jalpy ishki ónim halyqtyń jan basyna shaqqanda 412, 6 myń teńgege jetken. Ótken jyly bul kórsetkish 411,2 myń teńgeni quraǵan. Ónerkásip jáne kásipkerlik salasynda 35 kásiporyn jumys isteıdi. Esepti kezeńde jalpy ónerkásip ónim kólemi 11 mlrd 309 mln teńgeni qurap, ótken jyldyń tıisti kezeńimen salystyrǵanda ósim 106 paıyzdy quraǵan. Údemeli ındýstrııaldy - ınnovatsııalyq damý baǵdarlamasy aıasynda 2010-2017 jyldary jalpy quny 2 mlrd 214 mln teńgeni quraıtyn 10 joba iske qosylyp, 539 jumys orny ashyldy. Óndirilgen ónim kólemi 1 767,2 mln teńgeni qurap otyr», - dedi Álipbek Óserbaev.
