Túrkistan: Ordabasy aýdanynda úsh aıda 7,7 mlrd teńgeniń aýyl sharýashylyǵy ónimi óndirilgen

TÚRKІSTAN. QazAqparat - Ordabasy aýdanynda bıyl qańtar–naýryz aılarynda aýylsharýashylyǵy salasynda 7,7 mlrd teńgeniń kóleminde ónim óndirildi. Sondaı-aq, osy jyly 70,4 myń gektar jerge aýyl sharýashylyǵy daqyldaryn egý josparlanyp, búgingi kúnge jospar 93 paıyzǵa oryndaldy. Bul jaıynda aýdan ákimi Nurbek Badyraqov aımaqtaǵy sharýalarmen birge ótken semınarda málimdedi, dep habarlaıdy QazAqparat.

Sonymen qatar, Shubar aýyldyq okrýgindegi «Shubar» ÓK egistik alqabynda ótken semınarda mıneraldy jáne organıkalyq tyńaıtqyshtar, elıtaly ónimdiligi mol tuqym jáne aýyl sharýashylyǵy tehnıkalarynyń kórmesi uıymdastyryldy. Jıynda aýdan ákimi agroqurylym jetekshileri men sharýalarǵa ozyq tehnologııalardyń tıimdiligin baıandady.

«Qazirgi tańda jerden mol ári sapaly ónim alý úshin túrli organıkalyq, mıneraldy tyńaıtqyshtar qoldanysqa engizilip jatyr. Ýaqytty, adamı resýrstardy kóp qajet etpeıtin, jerdiń ylǵaldylyǵyn uzaq saqtaýǵa múmkindik beretin kóptegen tehnıkalar paıda bolyp jatyr. Óńirimizdegi birqatar agroqurylymdar atalǵan zamanaýı dúnıelerdi is júzinde paıdalanyp, jaqsy nátıjelerge qol jetkizip keledi. Mysaly, kórmede Eýropada shyǵarylǵan dán sebetin apparatty kórdik. Bir ózi bes túrli qyzmetti atqarady. Bir kúnde 50 ga jerge dán sebýge qaýqarly. Qurylǵynyń bir bóligi memleket tarapynan sýbsıdııalanady. Sonymen qatar, egistik alqapty dárileıtin dron 6-7 mınýtta 1 ga alqapty dárilep úlgeredi. Jalpy, osyndaı tehnologııalarǵa beıimdelý - búgingi kúnniń talaby. Odan bólek, qazir álem daıyn taǵamdardy tutynýǵa kóship jatyr. Bizde daıyn taǵam ázirleýge qajetti ónimderdi daıyndaý úshin múmkindigimiz bar», - dedi aýdan ákimi.

Aıta keteıik, Ordabasy aýdany boıynsha jalpy aýyl sharýashylyǵy jerleri – 218 234 gektardy quraıdy. Onyń ishinde egistik jerler – 87 348 ga.