Túrkistan óńirinde oblystyq mańyzy bar 300 shaqyrym jol jóndeledi
Eske salaıyq, búgin elordada Premer-Mınıstr Baqytjan Saǵyntaevtyń tóraǵalyq etýimen ótken jıynda ınfraqurylymdy damytýdyń 2015 - 2019 jyldarǵa arnalǵan jobasy, «Nurly jol» memlekettik baǵdarlamasynyń iske asyrylý barysy jáne energııa tıimdiligi men energııa únemdeýdi arttyrý jónindegi sharalar talqylandy.
Jıynda sóz alǵan QR Ulttyq ekonomıka birinshi vıtse-mınıstri Rýslan Dálenov «Nurly jol» memlekettik baǵdarlamasyn iske asyrýǵa 792 mlrd teńge qarastyrylǵanyn málimdedi. 1 qarashaǵa deıin onyń 410,8 mlrd teńgesi nemese 51,9 paıyzy ıgerilgen. Nátıjesinde kólik ınfraqurylymyn, energetıkalyq ınfraqurylymdy jáne turǵyn úı-kommýnaldyq sharýashylyq salasyn damytý baǵytyndaǵy birqatar sharýalar atqarylǵan. Máselen, jospar boıynsha 3475 shaqyrymdy quraıtyn 19 joba iske asyrylyp jatsa, jyl sońyna deıin onyń 426 shaqyrymy paıdalanýǵa berilip, 453 shaqyrym jol ashylatyn bolady.
Óz kezeginde Túrkistan oblysynyń ákimi Janseıit Túımebaev óńirdegi kólik ınfraqurylymynyń jaǵdaıymen tanystyryp, atqarylyp jatqan jumystardy baıandady.
«2018 jyly óńirde 161 shaqyrymdy quraıtyn oblystyq mańyzy bar joldyń qurylysyna respýblıkalyq bıýdjetten 3,288 mln teńge qarastyrylǵan. Sondaı-aq «Nurly jol» baǵdarlamasy sheńberinde 300 shaqyrym bolatyn oblystyq mańyzy bar joldy jóndeýge 2019 jylǵa respýblıkalyq qazynadan 7,5 mlrd teńge bólinip otyr. Osy qarjy tolyǵymen ıgerilse, keler jyldyń sońyna qaraı aımaqtaǵy oblystyq, aýdandyq mańyzy bar joldardyń jaqsy jáne qanaǵattanarlyq jaǵdaıdaǵy úlesin 74,1 paıyzǵa ósirýge múmkindik týady», - dedi oblys basshysy.
Sondaı-aq basqosýda energııa tıimdiligi jáne ony únemdeýdi arttyrý máselesi de qaraldy. QR Investıtsııalar jáne damý mınıstri Jeńis Qasymbektiń sózinshe, elimizdiń strategııalyq damý jospary jáne jasyl ekonomıkaǵa kóshý jónindegi tujyrymdamasy boıynsha 2020 jylǵa qaraı jalpy ishki óniminiń energııa syıymdylyǵyn kem degende 25 paıyzǵa, 2050 jylǵa qaraı 2 esege deıin tómendetý kózdelgen. Búginde respýblıkadaǵy energııany únemdeý sharalarynyń jospary japonııalyq tájirıbege súıenip jasalýda. Atalǵan salaǵa qatysty aqparatpen qanyqqan Úkimet basshysy oblys basshylaryna osy máselege basa nazar aýdarýdy tapsyrdy. Ásirese, ınvestorlar men energııany kóp jumsaıtyn kásiporyndarmen jumysty jandandyrý qajettigin eskertti.
