Túrkistan óńirinde latyn álipbıin nasıhattaý isi joǵary deńgeıde júrgizilip otyr
El Prezıdentiniń latyn álipbıine kóshý jónindegi bastamasy óńir halqy arasynda keńinen qoldaý tapty. Osy baǵytta Túrkistan oblysynda shet elderden kelgen jazýshylar, oblystyń zııaly qaýym ókilderi, túrkitanýshy ǵalymdardyń qatysýymen birqatar semınarlar men ǵylymı-praktıkalyq konferentsııalar uıymdastyryldy. Sonymen qatar, aǵymdaǵy jyldyń 19 maýsymynda oblystaǵy 428 kitaphanada latyn álipbıinen «Ulttyq mura» taqyrybynda dıktant jazý aktsııasy ótti. Kitaphanalardaǵy bul dıktantqa myńdaǵan adam qatysty.
Túrkistan oblysynyń ákimi Janseıit Túımebaev Ońtústik Qazaqstan memlekettik pedagogıkalyq ýnıversıtetinde stýdenttermen kezdesip, «Rýhanı jańǵyrý: jastarǵa jańa baǵdar» taqyrybynda lektsııa oqydy. Latyn álipbıiniń mán-mańyzyna toqtalǵan óńir basshysy ult sanasyn serpiltýde jańa álipbıdiń paıdasy mol ekenin jetkizip, bul másele nazarynda bolatynyn sóz etti.
«Rýhanı jańǵyrý» baǵdarlamasy boıynsha óńirlik jobalyq keńseniń málimetinshe, aldaǵy ýaqytta da latyn qarpin nasıhattaý, qoldanysqa engizý jolyndaǵy jumystar jalǵasa bermek. Óıtkeni, bul bastamaǵa qyzyǵýshylyq joǵary.
Sonymen birge, Túrkistan oblysynda «Jańa gýmanıtarlyq bilim: 100 jańa oqýlyq» arnaıy jobasy boıynsha da tıisti jumystar qolǵa alynǵan. Óńirde memlekettik tilge aýdarylǵan 18 oqýlyqtyń tanystyrylymy ótti. Oǵan joǵary oqý orny basshylary men zııaly qaýym ókilderi, stýdentter qatysqan. Stýdentterge baǵdarlamanyń negizgi basymdyqtary túsindirilip, «100 jańa oqýlyq» jobasy sheńberinde qazaq tiline aýdarylǵan oqýlyqtardy tanystyrý, latyn álipbıine kóshý jáne «Tsıfrlyq Qazaqstan» baǵdarlamasyn júzege asyrý maqsatynda onkúndik ótti.
Ýnıversıtette «Rýhanı jańǵyrý» alańy, «Qazaq tilindegi 100 jańa oqýlyq kovorkıng ortalyǵy» jáne oqýshylarǵa arnalǵan aqysyz kompıýter synyptary ashyldy. Búginde Túrkistan oblysyndaǵy 2 joǵary oqý ornynda Jobalyq keńseler qurylyp, «Rýhanı jańǵyrý» baǵytynda túrli alańshalar istep tur. Ýnıversıtet kitaphanalarynda «100 jańa oqýlyq» jobasy boıynsha arnaıy buryshtar jasaqtalǵan. Syrdarııa ýnıversıtetinde «100 jańa oqýlyq» jobasy aıasynda jaryq kórgen oqýlyqtar skanerlenip, ýnıversıtettiń saıtyna salyndy. Qazirgi tańda qundy kitaptar stýdentterdiń rýhanı ıgiligine jarap tur.
