Túrkistan óńirinde kókpar qyzyp tur
Ulystyń uly kúni Naýryz merekesi áli de jalǵasyn taýyp keledi. Ásirese, Ońtústik óńirinde Áz-Naýryz árbir kóshede, aýlalarda sán saltanatymen ótip jatyr. Odan bólek, shabandoz jastar kókpar oınap, ulttyq merekeni kóshpelilerdiń oıyndarmen qyzdyra túsýde.
Búginde Túrkistan óńirinde kókpar qyzyp tur. Eki kúnniń birinde at jetektep adyrǵa ketip bara jatqan jigitterdi kórýge bolady.
Al, keshegi kúni úlken kókpardyń biri Báıdibek aýdanynda uıymdastyryldy. Jalpy eki myńdaı shabandoz qatysqan oıyn tartysty ótti. Bilekti jigitter jańbyrdyń jaýǵanynda elemeı, kókserkeni tartqylap, kúsh synasty. Sondaǵy erekshe kózge túsken balýannyń biri qazyǵurttyq Aslanbek Saıdýlla.
«Ákem de, atam da at qulaǵynda oınaıtyn shabandoz bolǵan. Qanymyzda bolǵandyqtan, mende de qyzyǵýshylyq joǵary boldy. 9 synyptan bastap kókparǵa shyǵa bastadym. «Lashyn» atty jylqym bar edi. Talaı kókparda salym salyp, oljaly oraldyq. Qazirde qur qol kelmeımin», - deıdi shabandoz.
Aslanbek Faızýllauly 45 qarany qanjyǵasyna baılaǵan kánigi kókparshy. Onyń ishinde 9 túıe, 9 taı, 9 qara, 9 qoı, 9 serke oljalaǵan. Al, Báıdibek aýdanynda ótken kókparda eki ret salym salyp, 300 000 teńgeni ıelendi.
Myńnan astam at ishinen semiz serkeni alyp shyǵý úshin shabandoz túrli aıla-tásilderdi qoldanady. Sondaı-aq, fızıkalyq turǵydan myqty bolý úshin árdaıym sportpen shuǵyldanady. 32 jasar jigittiń basty armany da elge tanymal kókparshy bolý. Sonymen qatar, ata-babadan mura bolyp kele jatqan ulttyq oıyndy dáriptep, urpaǵyna úıretý.
«Uldarym áli kishkentaı. Ósken kezde kókparshy bolamyn dese qarsy bolmaımyn. At qulaǵynda oınaýdy úıretemin. Sebebi, árbir qazaq jigiti jylqyǵa júgen salyp, baǵyndyra alýy tıis. Kókpar shaýyp, kúsh synasýdy sezine alýy kerek. Sebebi, ómirdiń ózi kókpar» - deıdi ol.
Kókparda qyzyqty oqıǵalar men qatar, ómirge de qaýip tóndiretin kezder kóp kezdesedi. Mundaı da kókparshyny tek sheberligi men eptiligi qutqarary anyq. Odan bólek, kókpardyń qyzyǵyna túsken shabandozdarǵa kún-raıynyń qubylýy da kedergi keltire almaıdy.
«Jańbyr jaýyp tursa da oıyndy jalǵastyra beremiz. Atqa qonǵan soń, laı men batpaqty elemeımiz. Tipti qar jaýyp turǵanda da serke tartqan kezderimiz boldy. Bul jastardyń ulttyq oıynǵa degen qyzyǵýshylyǵyn kórsetse kerek» deıdi Aslanbek Saıdýlla.
Jalpy Naýryz aıy - júırik tulpar ústinde jigitterdiń kúsh synasyp, kim myqtyny anyqtaıtyn shaǵy. Sondyqtan bolar, bilekti de, júrekti jigitter jylqysyn ertip, kókpar bolatyn aýyldardy baǵytqa alýda. At dúbirimen qatar, bilektegi kúshti synap, ulttyq oıyndy ulyqtamaq. Mine, osylaısha, Túrkistan óńiriniń topyraǵynda kókpar qyzyp tur.
