Túrkistan óńirinde departament basshylary «Adal kómek» jobasy aıasynda keńes berýde
TÚRKІSTAN. QazAqparat – Túrkistan oblysynda «Adal kómek» jobasy aıasynda barlyq memlekettik organ basshylary onlaın formatta óńir turǵyndaryn tolǵantqan máselelerdi sheshý úshin azamattarmen keri baılanys ornatýǵa belsendilik tanytyp otyr. Olar áleýmettik jeliler arqyly «tikeleı efırge» shyǵyp, halyqqa aqparattyq baǵyt-baǵdar berýde, dep habarlaıdy QazAqparat tilshisi.
Alǵashqylardyń biri bolyp halyq pen bılik arasynda ashyq dıalogtyq alań ornatýdy maqsat etken oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov tikeleı efırge shyǵyp, mańyzdy aqparattarmen bólisti. El aýmaǵynda taraǵan qaýipti vırýstan qorǵanýdyń joldaryn jetkizip, «Túrkistan oblysynyń Bas memlekettik sanıtarlyq-dárigeriniń qaýlysyn oblys turǵyndaryna tanystyrý» taqyryby aıasynda áńgimelep berdi. Sondaı-aq, oblystyq tótenshe jaǵdaılar departamenti bastyǵynyń orynbasary, podpolkovnık Erik Sarybaev tikeleı efırde qoıylǵan qala turǵyndarynyń saýaldaryna naqty jaýap berip, usynys-pikirlerin tyńdady.
Aıta keteıik, aldaǵy ýaqytta «Adal kómek» jobasy aıasynda Túrkistan óńirine qarasty barlyq memlekettik organ basshylary onlaın formatta tolymdy aqparat berip otyratyn bolady.
