Túrkistan óńiri jaıly qos jınaqtyń tusaýy kesildi

TÚRKІSTAN. QazAqparat - Túrkistan oblysynda qos birdeı tarıhı kitaptyń tusaýy kesildi. Óńirlik kommýnıkatsııalar qyzmetinde ótken baspasóz jıynynda kitap avtorlary Q.A.ıAsaýı atyndaǵy HQTÝ oqytýshysy Muhtar Qoja men «Rýhanı jańǵyrý» jobalyq keńseniń bas menedjeri Qazybek Tájıev óz týyndylary týraly tarqatyp aıtty, dep habarlaıdy QazAqparat tilshisi.

Jınaqtardyń biri - «Tamyry tereń Túrkistan» kitaby 4 tilde (qazaq, orys, aǵylshyn, túrik) jaryq kórgen. Ekinshisi - «Túrkistan oblysyndaǵy kıeli jerler geografııasy» atymen shyqqan tórt tomdyq týyndy. Atalǵan kitaptar QR Tuńǵysh Prezıdenti N.Nazarbaevtyń «Bolashaqqa baǵdar: rýhanı jańǵyrý» atty maqalasy aıasynda basylyp otyr.

«Jınaqtardy shyǵarýdaǵy maqsat - ata-babalarymyzdyń jatqan jerlerin, eskerýsiz qalǵan esimderdi tanytý. Sondaı-aq tarıhı tulǵalar men qasıetti jerlerge qatysty ańyz-áńgimelerdi, el arasyndaǵy aýyzsha tarıhty túgendeý», - deıdi Qazybek Tájıev.

«Túrkistan oblysyndaǵy kıeli jerler geografııasynyń» alǵashqy tomynda Túrkistan men Sozaq aýdandarynda ornalasqan nysandar jaıly málimetter engizilgen. Al , «Tamyry tereń Túrkistan» atty ǵylymı-tanymdyq albomda rýhanı-mádenı, ekonomıkalyq, ónerkásiptik, kólik-logıstıkalyq, ishki-syrtqy týrızmdik, demografııalyq áleýeti sýrettelgen. Sondaı-aq, týyndyda Túrkistan óńiriniń búgingi kelbeti men damý baǵdary qamtylǵan.