Túrkistan: Óńirdi gazdandyrý jumystary kúsheıtiledi

TÚRKІSTAN.QazAqparat - Túrkistanda "Nur Otan" partııasynyń depýtattyq fraktsııasy turǵyndardy gazben qamtý isin jedeldetý jóninde májilis ótkizdi. Jıynda qurylys jumystary 2016-2018 jyldary aıaqtalyp qoısa da, tabıǵı gazǵa qosylmaǵan nysandardyń máselesin sheshý, gaz tasymaldaýshy mekemelerdiń jumysyn shıratý joldary talqylandy, dep habarlaıdy QazAqparat tilshisi.

Qazirgi tańda Túrkistan oblysyndaǵy 843 eldi mekenniń 385-i (45,7 %) nemese 1072 ,9 myń turǵyny (54,3 %) tabıǵı gazben qamtamasyz etilgen. Oblysta 2018 jylǵa deıin bıýdjet esebinen jalpy 223 nysanda 5,6 myń shaqyrymnan astam gaz júıeleriniń jáne 12 avtomatty gaz taratý stansasynyń qurylystary júrgizilgen. Oǵan qosa, byltyr qosymsha 42 eldi mekende gaz nysandarynyń qurylystary júrgizý tapsyrylǵan. Degenmen, 2016-2018 jyldary qubyrlardyń qurylysy aıaqtalǵan 78 eldi meken kógildir otynǵa qosylmaı otyr. Bul turǵyndardy alańdatady.

Májiliste oblystyq máslıhat depýtattary, oblystyq energetıka jáne turǵyn úı kommýnaldyq sharýashylyǵy basqarmasy basshylyǵy osy másele tóńireginde óz usynystaryn ortaǵa saldy. «QazTranGazAımaq» AQ-nyń Túrkistan oblystyq fılıaly da bul baǵytta jumysty shıratatyn boldy.

«Nur Otan» partııasy oblystyq fılıaly tóraǵasynyń birinshi orynbasary Nurmahan Joldasov eldiń talap-tilegin ýaqtyly oryndap, úılerine gaz kirgizý jumysyn jandandyrý kerektigin jetkizdi.

«Turǵyndar tarapynan gaz túıtkilderine qatysty shaǵymdar men ótinishter jıi túsedi. ıAǵnı, kemshilik bar degen sóz. Sondyqtan bárimiz birlesip, «kógildir otyn» máselesin jedel sheshýimiz qajet. Bul partııa baqylaýynda bolady. Partııanyń oblystyq fılıalynyń tóraǵasy, óńir basshysy Janseıit Qanseıituly jyl esebinde osy jumystardy jalǵastyrýdy tapsyrdy. Aldaǵy ýaqytta oblys aýmaǵyn jáne Túrkistan qalasyn 100 paıyz gazdandyrý baǵytynda jumystar kúsheıtiledi», - dedi N.Joldasov.

Aıta keteıik, aǵymdaǵy jyly Túrkistan qalasy turǵyndarynyń 60 paıyzǵa jýyǵy tabıǵı gazben qamtylady. Al, 2020 jyly qala tolyǵymen tabıǵı gazǵa kóshedi. Bul týraly qala ákimi Álipbek Óserbaev málimdegen bolatyn.

«Qalany gazben qamtý úsh kezeńmen júzege asyrylýda. Alǵashqy kezeńniń jumystary boıynsha 10518 abonentke gaz qubyry júrgizilip, 43 myńǵa jýyq qala turǵynyna tabıǵı gaz berildi. Búginde ekinshi jáne úshinshi kezeńniń quny 20 mlrd 271 mln teńgeni quraıtyn 11 jobasy ázirlenip, qurylys jumystary bastaldy», -dedi qala basshysy.