Túrkistan oblysynyń júzimderi Reseıge eksporttalýda
ShYMKENT. QazAqparat - Túrkistan oblysynyń júzimderi Reseıge eksporttalýda. Jetisaı aýdanynda ósirilgen júzimderdiń bir kelisi 120 teńgeden saýdalanyp otyr, dep habarlaıdy QazAqparat tilshisi.
Búginde atalǵan aýdandaǵy Abaı aýyldyq okrýginde 280 gektar júzimdik alqaby bar. Óńirdegi eń iri «Maharam» sharýa qojalyǵy egis alqabynyń ár gektarynan 25 tsentnerge deıin ónim alýda. Sharýalar júzimniń «Taıfy» sortynan jınalǵan ónimniń basym bóligi Reseıge jóneltilip jatqanyn aıtady.
Atalǵan qojalyqta 42 gektar jerge júzim egilgen bolsa, sonyń 26 gektarynan ónim alynyp otyr. Qojalyq tóraǵasy Maharam Nıftalıevtiń aıtýynsha, 1 gektarǵa shamamen 2 mıllıon teńgege jýyq shyǵyn ketken. 50 jylǵa jýyq ónim berýge qaýqarly júzim baqtary jalpy ketken shyǵyndy 5-6 jylda tolyǵymen aqtaıtyn kórinedi.
Aıta keteıik, sońǵy úsh jylda óńirde jemis-jıdek pen júzimniń egis kólemi 1,8 myń gektarǵa artyp, egis kólemi 30 myń gektarǵa jetken. Onyń ishinde jemis - 19,5 myń gektar, júzim - 10,5 myń gektardy quraıdy. Aǵymdaǵy jyly 85 myń tonna jemis-jıdek jáne 70 myń tonna júzim jınaý josparlanyp otyr. Sondaı-aq, respýblıkada óndirilgen júzimniń 72,5 paıyzy Túrkistan oblysynyń enshisinde.
