Túrkistan oblysynyń Jetisaı aýdanyna blokpost qoıyldy

TÚRKІSTAN. QazAqparat - Túrkistan oblysy Jetisaı aýdanynda koronavırýs juqtyrǵan 10 adam anyqtaldy. Osyǵan qaraı aýdanda karantın engizilip,saqtyq sharalary kúsheıtildi, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Eki birdeı aýyl qorshaýǵa alynyp, derttiń taralmaýyna barynsha kúsh salynyp jatyr. Osy tótenshe jaǵdaıdy eskergen Qurban ata aýylynyń turǵyndary jaman indettiń aldyn alý jáne qoǵamdyq tártipti saqtaý maqsatynda óz aýyldarynyń kireberis qaqpasyna blokpost ornatty.

«Bundaı jaǵdaıǵa el bolyp aqyldasyp kelip otyrmyz. Eldiń árbir adamynyń ómiri qymbat. Onyń ústine aýylymyz Jetisaı qalasyna jaqyn ornalasqandyqtan aýylǵa kelimdi-ketimdi adamdar kóp. Sonyń barlyǵyn eskere kele osyndaı qadamǵa baryp otyrmyz deıdi»,- aýyl turǵyny Dosym Ahmetov.

Búginde atalmysh aýylda 300-den astam úıde 2793 adam turady. Qazirgi tańda aýylǵa tirshilikti qamtamasyz etý maqsatynda kirip-shyǵatyn kólikter tirkeýge alynyp, túgeldeı dezınfektsııadan ótkizilýde.