Túrkistan oblysynyń ustazdary Máskeýde tegin oqıdy

Túrkistan qalasynda ótken oblystyq Tamyz keńesinde óńir basshysy Janseıit Túımebaev ustazdardyń áleýmettik jaǵdaıyn kóterý máselesine toqtaldy. Ustaz bededi - memleket bedeli ekenin atap ótken ol bilikti maman, otanshyl azamat tárbıeleý úshin muǵalimderdiń bilimi men qaıraty mol bolý kerektigin aıtty. Oblysta túlep ushyp, ózge óńirlerde qyzme etip júrgen bilikti mamandar men pedagogtardy týǵan jerge shaqyrý kerektigin jetkizdi.

Osy jıynda Janseıit Túımebaev Túrkistan oblysynda ustazdar qaýymyna memleket tarapynan áleýmettik qoldaý kúsheıtiletinin atap ótti. Máselen, bıylǵy qyrkúıek aıynan bastap ulttyq biliktilik testileýden ótken 4 200 pedagogtyń aılyq jalaqysy sanattaryna qaraı 30-50 paıyzǵa artady. Oǵan oblystyq bıýdjetten 1 mlrd 67 mln teńge bólingen. Bıyl jańartylǵan bilim berý mazmunymen sabaq berip jatqan 32 myńnan astam ustazǵa 30 paıyz jalaqy qosyldy. Oǵan bıýdjetten 10 mlrd 290 mln teńge qarastyrylǵan.

«Oblysymyz Túrkistan oblysy bolyp atalyp, oblys ortalyǵynyń Túrkistan qalasyna kóshýi de ustazdarǵa oń áserin tıgizip jatyr. Egerde, Sizder Túrkistan qalasyna kelgen jaǵdaıda aılyq jalaqylaryńyzǵa 20 paıyz qosymsha aqy, eńbek demalystaryńyzǵa 7 qosymsha kún, eńbek demalystaryńyzǵa 1 aılyq qosymsha saýyqtyrý aqysy qosylady. Áleýmettik sala qyzmetkerleri men ustazdar qaýymy úshin Túrkistan oblysynyń 13 aýdanynda ınvestorlar esebinen 14 myń sharshy metrli 31 turǵyn úı salynyp jatyr», - dedi oblys ákimi.
 

Búginde Túrkistan oblysynda kásiptik bilim sapasyn kóterý máselesine ákimdik tarapynan nazar aýdaryla bastady. Óńirimizdiń áleýmettik-ekonomıkalyq damýy úshin mańyzdy salanyń biri - tehnıkalyq jáne kásiptik bilim berý. Sebebi, kásiptik bilim mekemelerin bitirýshi túlekterdiń 25-30 paıyzy jumyspen qamtamasyz etilmeı keledi. Ol memlekettik tapsyrysty durys qalyptastyrmaýdan. Qoǵamǵa naqty qandaı mamandar qajet ekeni jiti zerttelmegendikten jastardyń birazy dıplomǵa saı jumys tappaı júr. Osy olqylyqty joıý maqsatynda bıyl kásiptik maman daıarlaý baǵytynda memlekettik tapsyrysty júıeleý úshin 7 jumysshy top qurylǵan. Jumysshy top qoǵamǵa asa qajetti mamandyqtardy saralaǵan. Osy jańa format boıynsha bıyl óńirge qajetti mamandar daıarlanady, jumyssyzdar sany azaıyp, memleket qarjysy tıimdi maqsatta jumsalady. Bıyl memlekettik tapsyrysqa respýblıkadan 3 mlrd 900 mln teńge al, oblystan 17 mlrd teńge qarastyryldy. Naqty qadam arqyly kásiptik bilimniń sapasy kóterilip, oblys ekonomıkasyna qajetti mamandar tapshylyǵy máselesi de sheshilmek.

Túrkistan oblysynyń muǵalimderi úshin taǵy bir jaǵymdy jańalyq bar. Bıyl birinshi ret óńir ustazdaryna M.Lomonosov atyndaǵy Máskeý memlekettik ýnıversıtetiniń magıstratýrasyna 20 grant bólindi. Olar úsh mamandyq boıynsha tanymal oqý oryndarynyń birinde bilimin jetildirip qaıtady. Igi iske oblys bıýdjetinen qarjy qarastyrylǵan.

Sonymen qatar, Qazyǵurt aýdanynda ornalasqan J.Qapparov atyndaǵy fızıka-matematıka baǵytynda oqytatyn mamandandyrylǵan mektep-ınternatyna shetten kelgen muǵalimderi úshin 15 jeke úı qurylysyn salý úshin qujattar daıyndalyp jatyr. Atalǵan bastamalar Túrkistan oblysynda bilim salasyna serpilis ákeledi degen senim bar.