Túrkistan oblysynyń turǵynynan túıneme belgileri baıqaldy
Túrkistan oblysy respýblıka boıynsha sibir jarasy ınfektsııasynyń qaýiptiligi joǵary aımaqtar qataryna ilikti. Ótken jyly oblysta asa qaýipti aýrýǵa shaldyǵýdyń 7 deregi tirkelgen bolatyn. Al, bıyl 1 derek anyqtalyp otyr.
«Bul dert adamnan adamǵa juqpaıdy. Infektsııa kózi – janýarlar. Aýrý maldy soıý kezinde nemese mal terisin óńdeý kezinde juǵady. Óńirde sibir jarasynyń 225 statsıonarlyq qolaısyz beketi men 392 oshaq mal qorymy bar», - deıdi oblystyq sanıtarııalyq-epıdemıologııalyq baqylaý departamentiniń baspasóz hatshysy Ardaq Berdenova.
Ókinishke qaraı, mal ustaýshylar arasynda tórt túligine asa qaýipti ınfektsııalarǵa qarsy vaktsına saldyrmaý, soıǵan malynyń etin veterınarııa mamandarynyń tekserýinsiz birneshe úıge taratyp berý, satyp jiberý jaǵdaılary jıi kezdesedi. Sondyqtan, dárigerler et ónimderin tek senimdi satýshylardan ǵana alý kerektigin eskertedi. Tipti, satýshylardan tıisti anyqtama suraý qajettigin qaperge beredi.
«Etti arnaıy veterınarııalyq ruqsaty bar oryndardan ǵana satyp alyńyz. Jeke úı-jaılarda soıylǵan mal etin tutynýdan aýlaq bolyńyz. Ol aýrý maldyń eti bolýy múmkin. Bul ómirińiz ben densaýlyǵyńyzǵa zııan keltiredi», - deıdi baspasóz hatshysy.
Eske sala keteıik, Býrabaıǵa demalýǵa kele jatqan túrkistandyqtan túıneme tabylǵan edi.