Túrkistan oblysynyń turǵyny úıinde 20 keli esirtki men qarý saqtaǵan
TÚRKІSTAN. QazAqparat -Túrkistan oblysynda PD Uıymdasqan qylmysqa qarsy kúres pen Esirtki bıznesine qarsy kúres basqarmasynyń qyzmetkerleri júrgizgen jedel-izdestirý is-sharalary barysynda buryn sotty bolǵan turǵyn ustaldy. Onyń úıin tintý kezinde oq-dárileri bar ańshylyq qarý men 20 keli marıhýana tárkilendi, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, sotty bolǵan turǵyndy ustaý sharasy 8 qarasha kúni keshkisin júrgizilgen. Tergeýshiler kúdiktiniń esirtki satýmen aınalysýy múmkin ekenin joqqa shyǵarmaıdy.
«Atalǵan jaıt boıynsha Qylmystyq kodekstiń 296-baby («Esirtki quraldaryn zańsyz tasymaldaý, saqtaý jáne ótkizý») jáne 287-baby («Qarý, oq-dárilerdi zańsyz tasymaldaý, saqtaý jáne ótkizý») boıynsha sotqa deıingi tergeý amaldary júrgizilýde. Saraptama taǵaıyndaldy. Kúdikti ýaqytsha ustaý ızolıatoryna jetkizildi» delingen habarlamada.
Aıta keteıik, Túrkistan oblystyq polıtsııasy aǵymdaǵy jyldyń on aıynda esirtkige qatysty 333 qylmysty anyqtaǵan. 6,5 tonna esirtki quraldary tárkilengen. 50-den astam esirtki satýshy qylmystyq jaýapkershilikke tartylǵan. Qarý saqtaý erejesin buzǵany úshin 1000-nan astam azamatqa ýchaskelik ınspektorlar ákimshilik hattamalar toltyrǵan.
