Túrkistan oblysynyń turǵyny ara uıalaryna arnalǵan arbada marıhýana saqtaǵan

TÚRKІSTAN. QazAqparat - Túrkistan oblysynyń polıtseıleri asa iri mólsherde esirtki zattaryn saqtaýmen jáne satýmen aınalysqan kúdikti er adamdy ustady. Bul týraly búgin brıfıngide oblystyq Polıtsııa departamenti bastyǵynyń orynbasary Qurmanbek Sahov málim etti, dep habarlaıdy QazAqparat tilshisi.

«Bizge Saıram aýdanynda belgisiz bireý esirtkini saqtaýmen, tasymaldaýmen jáne ótkizýmen aınalysatyny týraly aqparat kelip tústi. Atalǵan jaıtty QK-niń 296-baby 4-bóligi «esirtki quraldarymen, psıhotroptyq zattarmen, sol tektestermen ótkizý maqsatynsyz zańsyz jumys isteý« boıynsha Sotqa deıingi tergep-tekserýdiń biryńǵaı tizilimine tirkedik.

Jedel-izdestirý is-sharalarynyń nátıjesinde kúdikti qolǵa tústi. Ustalǵan er azamattyń úıi men aýlasyn tintý kezinde esirtki zaty bar 1 qap pen polıetılen paketin taptyq. Belgili bolǵandaı, er adam esirtkini ara uıalaryn tasymaldaýǵa arnalǵan arbada saqtaǵan. Saraptamaǵa sáıkes, tárkilengen esirtki zattarynyń jalpy salmaǵy 20 kelige jýyq marıhýana bolyp shyqty», - dedi Q. Sahov.

Qazirgi kezde kúdikti ýaqytsha ustaý abaqtysyna qamalǵan. Búginde oblysqa esirtki zattaryn jetkizý arnalary anyqtalýda.

Aıta keteıik, jyl basynan beri polıtseıler zańsyz aınalymnan 5 tonnadan astam esirtki zattaryn tárkilep, 55 esirtki satýshyny ustady. Sondaı-aq iri kólemde esirtkini saqtaýdyń 25 jaıtyn anyqtaǵan.