Túrkistan oblysynyń turǵyndaryn soltústik óńirlerge kóshirý jalǵasýda
TÚRKІSTAN. QazAqparat - Túrkistan oblysynyń turǵyndaryn soltústik oblystarǵa kóshirý jumystary jalǵasýda. Osy maqsatta Qostanaı oblysyna qarasty Qarabalyq aýdany ákimdiginiń mamandary Báıdibek aýdanynyń jurtshylyǵymen kezdesý ótkizdi, dep habarlaıdy QazAqparat tilshisi.
Qostanaıdan kelgen arnaıy top músheleri atalǵan aýdannyń Shaldar, Boraldaı eldi mekenderinde bolyp, túsindirý jumystaryn júrgizdi. Sońynan aýdan ortalyǵynda jıyn ótkizip, halqy tyǵyz ornalasqan óńir turǵyndaryn óz aımaqtaryna shaqyrdy.
Qarabalyq aýdany ákiminiń orynbasary Rýslan Halyqovtyń aıtýynsha, Chelıabi oblysymen shektesetin óńirde nebári 28 myń halyq turady. Qazir munda barlyq áleýmettik salalardan bastap, mehanızator, júrgizýshilerge deıin jumys qoly tapshy. Qonys aýdaramyn deýshilerge memleket tarapynan kóptegen jeńildikter qarastyrylady.
