Túrkistan oblysynyń toıhanalarynda sanıtarlyq talaptar saqtalmaıdy
Tekserý qorytyndysy boıynsha toıhananyń 33 qyzmetkeri ýaqytsha jumysynan shettetildi. Bul týraly oblystyq qoǵamdyq densaýlyq saqtaý departamentiniń basshylyǵy brıfıng barysynda málimdedi.
Óńirde barlyǵy 263 toıhana bar bolsa, jyl basynan bergi alty aıdyń ishinde olardyń 59-y tıisti tekserýlerden ótken. Basym bóliginde qyzmetkerlerdiń medıtsınalyq tekserýden ótpegeni jáne tazalyq normalary saqtalmaıtyny belgili bolǵan.
«Toıhanalardy tekserý barysynda túsingenimiz, sanıtarlyq talaptardy saqtamaıdy, eskermeıdi de. Jáne jıi kezdesetin taǵy bir olqylyq - ónim qaýipsizdigi men sapasyn rastaıtyn qujattary joq. Qyzmetkerler arnaıy kıimsiz jumys isteıdi jáne bakterıotsıdtik lampa alynbaǵan. Tehnologııalyq protsess saqtalmaıdy, sondaı-aq tońazytqyshtar sany jetkiliksiz. Jumysshylardyń medıtsınalyq tekserýden ótkenin rastap, jumys isteýine ruqsat beretin jeke medıtsınalyq kitapshasy joq. Tekserý qorytyndysy boıynsha ýaqytsha jumystan shettetilgenderdiń arasynda daıashydan bastap aspazǵa deıin bar»,- deıdi oblystyq qoǵamdyq densaýlyq saqtaý departamenti basshysynyń orynbasary Aldan Ahmetov.
Sala mamandary tekserý sharalaryn munymen toqtatpaq emes. Aldaǵy ýaqytta qalǵan toıhanalar da tekseristen ótedi.