Túrkistan oblysynyń Tólebı aýdanynda 9 eldi mekenge gaz berildi
Túrkistan oblysy ákiminiń orynbasary Meıirjan Myrzalıev, aýdan ákimi Baýyrjan Omarbekov osy úlken qýanyshqa baılanysty ótken jıynǵa qatysyp, turǵyndardyń qýanyshyna ortaqtasty.
Jıynda aýdan basshysy quttyqtaý sóz sóılep, ózge eldi mekendergede gaz jetkizý máseleleri qaralyp jatqanyn aıtty.
2017-2019 jyldar aralyǵynda respýblıkalyq bıýdjet esebinen 1 mlrd. 988 mln. teńgege Tasaryq aýyldyq okrýgindegi Tasaryq, Jambyl, Hanaryq, Ońtústik, Qaratóbe aýyldyq okrýgindegi Maıbulaq, Qostóbe, Qaratóbe, Baldyberek, Tóńkeris eldi mekenderine aýylishilik gaz qubyrynyń qurylysy júrgizilgen bolatyn.
Qazirgi tańda 9 nysandy syǵymdaý aktilerimen oryndaýshy tehnıkalyq qujattary rásimdelgen. Búginde 9 eldi meken boıynsha 1542 abonenttiń 793 abonentine tehnıkalyq sharttar alynyp, ishki gaz qubyrlary júrgizilgen. Sondaı-aq «QazTransGazAımaq» AQ-na tirkelgen. Búgin paıdalanýǵa berilgen gaz júıesin qosqanda, aýdan kólemindegi 55 eldi mekenniń 48-i tabıǵı gaz júıesimen qamtylmaq.
Aýdanda qalǵan Qoǵaly aýyldyq okrýginiń Dıhankól, Uzynaryq, Alshaly jáne Qasqasý aýyldyq okrýginiń Qasqasý, Joǵarǵy Qasqasý, Keńesaryq, Keregetas eldi mekenderin tabıǵı gazben qamtamasyz etý úshin jobalaý-smetalyq qujattamasy ázirlenip, saraptamanyń oń qorytyndysy alyndy. Smetalyq quny – 1 mlrd. 269 mln. teńge.
Jobany qarjylandyrý úshin 2020 jylǵa arnalǵan respýblıkalyq jáne oblystyq bıýdjetke usynylyp, qarjylandyrý kútilýde. Joba qanaǵattandyrylǵan jaǵdaıda Tólebı aýdanynyń 55 eldi mekeniniń 118 600 turǵyny 100% tabıǵı gazben qamtamasyz etiledi.
