Túrkistan oblysynyń taýlarynda joǵalǵan týrısterdi izdestirý jumystary jalǵasýda
ALMATY. QazAqparat – Kınologııalyq esepti qosa alǵanda 10 adamnan turatyn respýblıkalyq jedel-qutqarý jasaǵynyń (RJQJ) jeke quramy, Túrkistan oblysynyń taýlarynda izdestirý-qutqarý jumystaryn jalǵastyrýda, dep habarlaıdy QazAqparat tilshisi.
10 maýsym kúni Ógem arnasynyń boıyndaǵy Jetiúńgir shatqaly men Ógem jáne Aıǵyrjyqqan ózenderiniń qosylǵan jeri zertteldi, alaıda izdeý jumystary nátıje bermedi.
11 maýsymda RJQJ qutqarýshylary tikushaqpen týrısterdiń zattary tabylǵan jerge jetkizildi.
«Qutqarýshylar eki topqa bólinip, Aıǵyrjyqqan shatqalynda izdestirý-qutqarý jumystaryna kiristi. Іzdeý-qutqarý jumystary ózenniń kúshti aǵysyna jáne taýly relefke baılanysty kúrdelene túsýde. Sonymen qatar, joǵalǵan stýdentterdi izdeý aımaǵyn keńeıtý maqsatynda, 11 maýsym kúni Respýblıkalyq jedel-qutqarý jasaǵynan qosymsha kúsh retinde, jeke quramnan 8 adam jiberildi, onyń 2 kınologııalyq esep»,-dep habarlady «QR TJM RJQJ» MM baspasóz qyzmeti.
Eske salasaq, ótkende Tólebı aýdanynyń 112 pýltine, Saıram-Ógem memlekettik ulttyq tabıǵı parkiniń aýmaǵynda 7 adamnyń joǵalǵany týraly habarlama 2021 jylǵy 25 mamyrda, 18 saǵat 30 mınýtta kelip túsken bolatyn.
21 mamyrda týrıster jaıaý «Sary-Aıǵyr» shatqalyna bet alǵan, al 24 mamyr qaıtý kerek bolatyn.
Buǵan deıin joǵalǵan úsh týrıst tabylyp, qutqaryldy.
Ókinishke oraı, eki týrıstiń denesi tabyldy.
