Túrkistan oblysynyń taýlarynda joǵalǵan eki týrıstiń denesi tabyldy
TÚRKІSTAN. QazAqparat - Túrkistan oblysynyń taýlarynda joǵalǵan eki týrıstiń denesi tabyldy, - dep habarlady TJM resmı ókili Talǵat Ýálı.
«29 mamyr kúni saǵat 00:30-da izdestirý jumystarynyń barysynda Ógem ózeninen bir adamnyń denesi tabyldy. Ol 1999 jyly týǵan, taýda joǵalyp ketken týrıster tobynyń biri ekeni anyqtaldy. Ekinshi jigittiń denesi búgin Ógem ózeninen 3 shaqyrym jerden tabyldy» delingen habarlamada.
Jigitterdiń denesi «Qazavıaqutqarý» AQ MI-171 tikushaǵymen Shymkent qalasyna jóneltildi.
Qalǵan eki adamdy izdestirý jumystary jalǵasýda. Jerdegi izdestirýdi qutqarýshylar, polıtsııa qyzmetkerleri, shekara qyzmetiniń at patrýli, ulttyq park qyzmetkerleri jáne joǵalǵandardyń týystary júrgizýde. Sondaı-aq, áýeden izdeý úshin QR TJM «Qazavıaqutqarý» AQ eki borty jumys isteýde.
Atalǵan fakti boıynsha Túrkistan oblysynyń polıtsııa departamenti sotqa deıingi tergeýdi bastady. Saraptamalar taǵaıyndaldy, olardyń nátıjeleri boıynsha ólimniń sebebi anyqtalatyn bolady.
Eske salaıyq, Tólebı aýdanynyń Saıram-Ógem memlekettik ulttyq tabıǵı parkiniń aýmaǵynda 7 adamnyń joǵalǵany týraly habarlama 2021 jylǵy 25 mamyrda 18 saǵat 30 mınýtta kelip tústi. Olardyń úsheýi keshe tabylǵan bolatyn. 21 mamyrda týrıster jaıaý «Sary-aıǵyr» shatqalyna bet alǵan jáne 24 mamyrda qaıtý qajet bolǵan. Alaıda qaıtar jolda adasyp ketken.
