Túrkistan oblysynyń tártip saqshylary Reseı azamatyna urlanǵan kóligin taýyp berdi
TÚRKІSTAN OBLYSY. QazAqparat – Túrkistan oblysy Polıtsııa departamentiniń krımınaldyq polıtsııa qyzmetkerleri Reseı azamatyna urlanǵan qymbat avtokóligin qaıtaryp berdi, dep habarlaıdy departamenttiń baspasóz qyzmeti.
Esterińizge sala keteıik, Saryaǵash APB-ne Reseı júrgizýshisi aryzdanyp, Jibek joly eldi mekenindegi avtoturaǵynan belgisiz azamattardyń onyń quny 20 mıllıon teńgeden asatyn «Toıota Land Krýzer 200» markaly avtokóligin urlap ketkenin kórsetken. Atalǵan jaıt Saryaǵash APB-ne QR QK-niń 188-baby «Urlyq» boıynsha sotqa deıingi tergeýdiń biryńǵaı tizilimine engizildi.
Qylmysty ashý maqsatynda Túrkistan oblysy PD Krımınaldyq polıtsııa jáne Tergeý basqarmasynyń tájirıbeli qyzmetkerleri qatarynan jedel-tergeý toby quryldy. Polıtsııa qyzmetkerleri qajetti jedel-izdestirý is-sharalaryn ótkizdi, onyń ishinde qylmys ornyn tekserip, kýágerler arasynda suraq-jaýap júrgizdi.
Іske asyrylǵan sharalar nátıjesinde, jedel ýákilder avtokólikti aıdap ketken kúdiktilerdiń izine tústi. Olar Shymkent qalasynan ustaldy. Kúdiktiler aǵaıyndy jáne megapolıs turǵyndary bolyp shyqty. Sondaı-aq, Túrkistan oblysynyń polıtsııa qyzmetkerleri júrgizilgen izdestirý is-sharalary barysynda, Qaraǵandy qalasynda urlanǵan zatty satyp alýshy qolǵa tústi.
Qazirgi tańda kúdiktiler qamaýda. Sotqa deıingi tergeý barysynda jedel ýákilder qrlanǵan 5 qymbat avtokólikti tapty. Olardyń arasynda RF Lıpetsk qalasynyń turǵyny Aleksandr Negrobovanyń «Djıp» markaly kóligi de boldy.
Belgili bolǵandaı, onyń Lıpetskidegi shetel kóligin belgisiz bireýler urlap ketken. Bul týraly ol qalalyq polıtsııaǵa málimdedi. Eki aı ótken soń oǵan kóligin Qazaqstanda Túrkistan polıtseıleri tapqany týraly qońyraý kelip tústi. Búgin Aleksandr Túrkistanǵa keldi. Qajetti is-sharalardan keıin er adam óz menshigin alady.
Óz kezeginde, reseılik azamat Túrkistan oblysy tártip saqshylarynyń jumysy men qyzmetine tabys tiledi jáne taǵy da krımınaldyq polıtsııa qyzmetkerlerine urlanǵan kóliginiń qaıtarylǵany úshin alǵysyn bildirdi.
