Túrkistan oblysynyń Sozaq aýdanyndaǵy eki aýyl taratylady

ASTANA. QazAqparat – Halyq sanynyń az bolýyna baılanysty Túrkistan oblysyndaǵy qos birdeı eldi mekeni taratylýy múmkin, dep habarlaıdy QazAqparat tilshisi.

«Túrkistan oblysy Sozaq aýdany Sozaq aýyldyq okrýginiń Qaqpansor eldi mekeni jáne Jýantóbe aýyldyq okrýginiń Qońyrataryq eldi mekeni taratylsyn. Osy birlesken qaýly men sheshim onyń alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi», - delingen ákim qaýlysy men oblystyq maslıhattyń birlesken sheshiminde.

Buǵan deıin jarııalanǵan Túrkistan oblysy ákimdiginiń habarlamasynda Qaqpansor jáne Qońyrataryq eldi mekenderinde turatyn halyq sany 200 adamnan kem ekeni kórsetilgen. Osyǵan baılanysty atalǵan aýyldarly taratý týraly sheshim qabyldanyp otyr.

Sheshim-jobasy 19 shildege deıin kópshilik talqylaýda bolady.

Sonymen birge, Túrkistan oblysyna qarasty Nura aýyly da taratylady.