Túrkistan oblysynyń sheneýnikteri bastaǵan marafonshylar 2,5 km baǵyndyrdy
TÚRKІSTAN. QazAqparat - Túrkistanda oblysynyń ákimdigi men oblystyq Dene shynyqtyrý jáne sport basqarmasynyń uıymdastyrýymen memlekettik qyzmetshiler arasynda buqaralyq marafon ótti, dep habarlaıdy QazAqparat.
Aımaq ákiminiń baspasóz qyzmetinen málim etkendeı, Sybaılas jemqorlyqqa qarsy is-qımyl agenttigi Túrkistan oblysy boıynsha departamentiniń basshysy, general-maıor Hakım Qoshqalıev, Túrkistan oblysy ákiminiń orynbasary Sáken Qalqamanov jáne oblystyq Dene shynyqtyrý jáne sport basqarmasynyń basshysy Polat Qyryqbaev bastaǵan sharaǵa 300-ge jýyq memlekettik qyzmetshi qatysty.
Marafon B.Sattarhanov dańǵylynyń boıyndaǵy Tikushaq alańynan bastalyp, Túrkistan qaqpasynan «Rámizder alańyna» deıin jalǵasty. Qatysýshylar 2400 metr qashyqtyqty júgirip ótti.
Shara maqsaty – Qazaqstan Respýblıkasynyń Prezıdenti Q.Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýy men Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyn júzege asyrý arqyly halyqty salaýatty ómir saltyna baýlý, Memlekettik qyzmetshilerdiń otansúıgishtik, patrıottyq sezimin oıatý.
Márege birinshi bolyp jetken «Ońtústikfılm» kınostýdııasynyń taspageri Bekzat Muratuly «Marafonnyń úzdik sportshysy» atandy. Jeńimpazdar men júldegerlerge arnaıy dıplomdar men baǵaly syılyqtar tabystaldy.
