Túrkistan oblysynyń shekaralarynda blokposttar qoıyldy
TÚRKІSTAN. QazAqparat - Túrkistan oblysynda 18 naýryzdan bastap Almaty jáne Qyzylorda baǵytyndaǵy shekaralyq aımaqtarda ornalasqan «Saýran» jáne «Shaqpaq» beketterinde táýlik boıy jumys isteıtin blokposttar qoıyldy, dep habarlaıdy QazAqparat.
Polıtsııa jáne medıtsına mamandary árbir kólikti toqtatyp, arnaıy qurylǵymen azamattardyń dene qyzýlaryn ólshep, tekseristen ótkizýde. Máselen, Shymkent-Samara tasjolynyń 208-shaqyrymyndaǵy «Saýran» beketinde koronavırýstyń Túrkistan oblysy aýmaǵyna enbeýin qadaǵalaý maqsatynda arnaıy blokpost táýlik boıy jumys isteýde. Búgin tańǵy 9:00den 13:00-ge deıin 200-ge jýyq kólik tekserildi.
Túrkistan oblysynyń Taýarlar men kórsetiletin qyzmetterdiń sapasy men qaýipsizdigin baqylaý departameti basshysynyń orynbasary Baqtyoraz Elemesov qazirge deıin ystyǵy kóterilgen kúdikti azamattar anyqtalmaǵanyn aıtty.
«Oblystyń shekaralyq aımaqtaryndaǵy Saýran», «Shaqpaq» beketterinde arnaıy blok-posttar táýlik boıy kezekshilikte. Onda mamandar arnaıy 3 perometrmen jáne qorǵanys quraldarymen qamtamasyz etilgen. Qurylǵy azamattardyń dene temperatýrasyn 2-3 sekýndta anyqtaıdy. Qazirge deıin beketterde kúdikti azamattar anyqtalmady», - dedi departament ókili.
Sonymen qatar, Shymkent-Almaty tasjoly boıyndaǵy Shaqpaq beketinde de blokpost táýlik boıy kezekshilikter tur. Ár beket táýligine 400-ge jýyq kólikti tekseristen ótkizýde.
Budan ózge, Túrkistan oblysyndaǵy árbir aýdannyń ákimshilik shekaralarynda da epıdemııanyń taralýyna tosqaýyl qoıatyn arnaıy mamandar beketterge jumys istep otyr.
