Túrkistan oblysynyń sharýalary kalıfornııalyq qyzyl qurttardy ósirýde
TÚRKІSTAN. QazAqparat – Túrkistan oblysynda bıogýmýs bıznesi damyp keledi, dep habarlaıdy QazAqparat tilshisi.
Ordabasy aýdany Bórjar aýyldyq okrýgine qarasty Qaınar eldi mekeniniń turǵyny Baqytjan Ásembekov kalıfornııalyq qyzyl qurttardyń basyn kóbeıtip, bıogýmýs óndirýde. ıAǵnı, organıkalyq taza tyńaıtqyshty tabıǵı jolmen jasap jatyr.
«Búginde bıogýmýsqa qajetti shıkizat aýyl turǵyndarynyń aýlasynan kóptep tabylady. Endi sony kádege jaratyp, tórt túliktiń kóńine shylaýshyn qosyp, qarashirikke, ıaǵnı, organıkalyq tyńaıtqyshqa aınaldyrý arqyly egistik jerdiń qunaryn arttyrýǵa bolady. Jerdiń qunarlyǵy artyp, ol 3 jylǵa saqtalady. Bul, birinshi kezekte shetten keletin hımııalyq tyńaıtqyshtarǵa táýeldilikti azaıtady», - deıdi ol.
Kalıfornııalyq qyzyl qurttardyń ómir súrý uzaqtyǵy – 15 jyl. Óte tózimdi ári tez kóbeıedi, ósimtal. Kez kelgen adam úı aýlasynda ósire alady.
Qazirgi tańda bul kásippen Ordabasy aýdanynda 15-ke jýyq azamat shuǵyldanyp keledi. Keshegi kúni Bórjar aýyldyq okrýgine qarasty Qaınar eldi mekeninde aýdan sharýalaryna bıogýmýs organıkalyq tyńaıtqyshyn óndirýdiń qyr-syryn úıretýge arnalǵan semınar-keńes ótti.
Kezdesýge Almaty, Aqtóbe qalalary men Túrkistan oblysyna qarasty barlyq aýdan-qalalardan 100-den astam sharýa qatysty. Kezdesýde sala mamandary bıogýmýs bıznesi boıynsha tájirıbemen bólisip, qatysýshylarǵa kásipti qalaı bastaý kerektigin egjeı-tegjeıli baıandap, onyń qyr-syry boıynsha tolyq aqparat berdi.
