Túrkistan oblysynyń sharýalary bıyl 500 myń tonnaǵa jýyq ónimdi eksportqa shyǵardy

TÚRKІSTAN. QazAqparat - Túrkistan oblysynyń taýar óndirýshileri demalys kúnderi elordada aýyl sharýashylyǵy ónimderiniń kezekti jármeńkesin ótkizdi. Eki kúndik shara Astana qalasynyń 20 jyldyq merekesine arnaldy, dep habarlaıdy QazAqparat tilshisi.

Jármeńkege jalpy quny 201 mln teńgeni quraıtyn 496 tonna aýyl sharýashylyǵy ónimderi usynyldy. Atap aıtqanda, 80 tonna et jáne et ónimderi, 141 tonna kókónis, 28 tonna sút ónimderi, 90 tonna baqsha ónimderi, 53 tonna jemis-jıdek, 26 tonna kartop, 10 myń dana jumyrtqa, 5 tonna balyq, 4 tonna bal, 10 tonna keptirilgen jemis, 14 tonna túrli konserviler jáne 45 tonna basqa da ónimder bazar narqynan 10-15 paıyz tómen baǵada saýdalandy.

Arzandatylǵan baǵada azyq-túlik satyp alǵan astanalyqtar jármeńke uıymdastyrýshylary men ońtústik óńiriniń sharýalaryna alǵystaryn bildirdi. Shara barysynda Elorda turǵyndary men qonaqtaryna arnalǵan kontserttik baǵdarlama usynyldy.

Aıta keteıik, túrkistandyq sharýalar Astana qalasynyń 20 jyldyq merekesi aıasynda osymen 4-shi ret jármeńke ótkizip otyr. Osy aralyqta Elordaǵa 14 753 tonnany quraıtyn aýyl sharýashylyǵy ónimderiniń 28 túri jóneltildi. Jármeńkeni ótkizýge túrkistandyq 35 iri jáne qosalqy sharýa qojalyqtary men kásiporyndary atsalysqan.

Jalpy, bıyl túrkistandyq sharýalar 500 myń tonnaǵa jýyq ónimdi Reseı, Belarýs, Latvııa, Germanııa memleketterine eksporttasa, 1 mln. tonna taýar elimizdiń soltústik óńirlerine jóneltildi.