Túrkistan oblysynyń Shardara aýdanynda 40 otbasy baspanaly boldy

Bul týraly QazAqparat Túrkistan oblysy ákiminiń baspasóz qyzmetine silteme jasap habarlaıdy.

Qonys ıelerine memleket tarapynan qolǵa alynǵan «Nurly jer» baǵdarlamasynyń aıasynda salynǵan 4 qabatty 40 páterli turǵyn úı kesheniniń jańa páter kiltteri tabystaldy. Jańa baspanaǵa az qamtylǵan jáne kópbalaly otbasylar jáne úı kezeginde turǵan muqtaj januıalar qonystandy.

«Aýdanda atqarylyp jatqan barsha jumystar men ıgi bastamalar, jalpy aýdanymyzdyń turǵyndary úshin jasalyp keledi. Barlyǵymyz da elimizdi gúldendirý úshin árqashan birlikte, yntymaqta ıgi ister atqaryp, jarqyn bolashaq úshin eńbek ete bereıik! Osyndaı qýanyshty sátte páter ıelerine úılerińizde árqashan da jylylyq pen qýanysh bolsyn degen tilek bildiremin. Qonys qutty bolsyn!», – dedi baspana ıeleriniń qýanyshyna ortaqtasqan aýdan ákimi Qaırat Joldybaı.

Bıyl Shardara qalasynda birqatar nysandar paıdalanýǵa berilýde. Munaı baza, №14 Beket shaǵyn aýdandary men Aqberdi aýylyna taza aýyzsý júıeleri tartyldy. Aýdandaǵy eldi mekenderdi gazdandyrý jumystary aıaqtalyp, birneshe aýyl tabıǵı gaz kózine qosyldy. Odan bólek, Shardara qalasyna gaz qubyrlary tartylýda.

Shardara qalasynda jalpy 74 kópqabatty turǵyn úı ornalasqan. Kópqabatty turǵyn úılerdegi páterler sany – 1394. Onda 6 myńǵa jýyq turǵyn turady. Bul qala halqynyń 16%-yn quraıdy. Shaharda sońǵy 4 jylda 14 kópqabatty turǵyn úı kúrdeli jóndeýden ótken.