Túrkistan oblysynyń shalǵaı aýyldaryna jyljymaly medıtsınalyq keshen jolǵa shyqty
TÚRKІSTAN. QazAqparat - Koronavırýs indetiniń taralýyna qarsy kúres sharalarynyń aıasynda Túrkistan oblysyndaǵy densaýlyq saqtaý mekemeleriniń materıaldyq-tehnıkalyq bazasy jańartylýda.
Búgin oblystyń shalǵaı aýyldary 12 jyljymaly medıtsınalyq keshenmen, jedel járdem stantsııasynyń parki 13 reanımobılmen tolyqty, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Saltanatty sharaǵa aımaq basshysy Ómirzaq Shókeev qatysyp, medıtsına qyzmetkerlerine janqııarlyq eńbekteri úshin alǵysyn bildirdi.
«Memleket basshysy Qasym-Jomart Toqaevtyń tapsyrmasymen elimizdiń barlyq oblystary otandyq óndiristerde jabdyqtalǵan 100 jyljymaly medıtsınalyq keshenmen qamtamasyz etilýde. Túrkistan oblysyna bólingen 12 jyljymaly medıtsınalyq keshen dál qazir oblystaǵy shalǵaı aýyldarǵa jolǵa shyǵady. Bul – bizdiń árbir azamatymyzdyń ómiri men densaýlyǵyn qorǵaýǵa baǵyttalǵan shara. Qurmetti medıtsına qyzmetkerleri! Sizder koronavırýspen kúreste aldyńǵy shepte júrsizder. Atqarylǵan jumystar - erlikterińizdiń dáleli, dep oılaımyn. Ózderińizge oblys turǵyndary atynan alǵysymdy bildiremin»,-dedi Ómirzaq Estaıuly.
Elimiz boıynsha oblystarǵa bólingen 100 jyljymaly medıtsınalyq keshenniń 12-si Túrkistan oblysyna tıesili. Osylaısha shalǵaı aýdandardy jyljymaly medıtsınalyq keshenmen qamtamasyz etý kórsetkishi 100%-dy qurady. Kóshpeli aýrýhana aýdan ortalyǵynan 100-200 shaqyrym jerdegi aýyldarǵa baryp, turǵyndarǵa qyzmet kórsetetin bolady.
Otandyq óndiristerde jabdyqtalǵan jyljymaly medıtsınalyq dıagnostıkalyq keshender Úkimeti rezerviniń esibinen alynǵan. Osylaısha aýdandarǵa qarasty 167 aýyldyń turǵyndaryna medıtsınalyq jáne skrınıngtik tekserýler men basqa da kómekter kórsetiletin bolady. Bul óz retinde, aýyl turǵyndarynyń medıtsınalyq qyzmetterge qoljetimdigin arttyrady.
Zamanaýı medıtsınalyq keshen flıýrografııa, ýltradybystyq apparat, zertteýlerge arnalǵan analızatorlar, oftalmoskop, glıýkometr jáne taǵy basqa quraldarmen jabdyqtalǵan. Dárigerler azamattardy tolyq tekserýden ótkizip, aýrýdy der kezinde anyqtaı alady.
Sondaı-aq, koronavırýstyń yqtımal ekinshi tolqynyna daıyndyq aıasynda búgin oblystyq jedel járdem stantsııasynyń parki 13 reanımobılmen tolyqty. Oblystyq jedel-járdem qyzmetin jyl sońyna deıin 122 avtokólikpen jabdyqtaý kózdelgen. Bul medıtsınalyq jedel-járdem qyzmeti parkin 96%-ǵa jańartýǵa múmkindik beredi.
