Túrkistan oblysynyń Saıram aýdanynda zamanaýı murajaı salynýda
TÚRKІSTAN. QazAqparat - Túrkistan oblysynyń Saıram aýdanynda jańadan zamanaýı úlgidegi murajaı salynyp jatyr, dep habarlaıdy QazAqparat oblys ákiminiń baspasóz qyzmetine silteme jasap.
Aýdandyq qurylys bóliminiń tapsyrysy boıynsha boı kóterip jatqan nysannyń jalpy quny - 86,4 mln teńge. 2018 jyldyń tamyz aıynda bastalǵan qurylys jumystary aıaqtalyp, murajaı bıyl paıdalanýǵa beriledi dep kózdelip otyr.
Túrkistan oblysy ákiminiń baspasóz qyzmetiniń Saıram aýdanyna uıymdastyrǵan baspasóz týry kezinde jýrnalıster nysannyń qurylysymen tanysty.
«Mundaǵy sharýalar kúzde bastalǵan. Aýa raıyna baılanysty qurylys qarqyny azdap baıaýlady. Alaıda kúnniń erte jylynǵanyn paıdalanyp, tıisti jumystardy der kezinde istedik. Qazirgi tańda negizgi sharýalar aıaqtaldy, ishin árleýge kiristik. Sátin salsa, sáýir aıynda paıdalanýǵa beriledi degen jospar bar. Qurylys jumystaryna jergilikti 26 turǵyn tartylǵan. Qoldanyp jatqan qajetti materıaldardyń barlyǵy ózimizdiń elden shyqqan», - dedi ýchaske bastyǵy Batyr Tólegenov.
Sala mamandarynyń sózinshe murajaıdy salýdaǵy maqsat - tarıhy tereńde jatqan aýdandaǵy qundy jádigerlerdi, óńirdiń tarıhynan syr shertetin túrli tarıhı buıymdardy jınaqtap, bir jerge shoǵyrlandyrý. Zamanaýı úlgide boı kóterip jatqan ǵımaratta qundy dúnıelerdi uzaq saqtaý úshin murajaıǵa laıyq barlyq talaptar saqtalatyn bolady.
Aıta keteıik, tarıhı ataýdy ıelengen aýdanda buryn-sońdy arnaıy salynǵan murajaı bolmaǵan.
