Túrkistan oblysynyń prokýrory túrmede jazasyn óteýshilermen kezdesti

TÚRKІSTAN. QazAqparat - Túrkistan oblysynyń prokýrory Nurǵalym Ábdirov Tólebı aýdanyndaǵy ICh-167/9 túzeý mekemesine baryp, onyń jeke quramymen áńgime ótkizdi. Túzeý mekemesinde sottalýshylardyń ómir súrýine qandaı jaǵdaı jasalǵanyn qarap shyqty, dep habarlaıdy QazAqparat tilshisi.

Mekemeni aralaý barysynda Nurǵalym Ábdirov jábirlenýshilerge zalaldy óteý deńgeıin joǵarylatý jáne qylmystyq ister boıynsha qaryzy bar sottalýshylardy jumyspen qamtý máselelerin mekeme ákimshiliginiń aldyna qoıdy. Sonymen qatar, sottalýshylarmen jeke qabyldaý ótkizip, olardy tolǵandyrǵan máselelermen tanysty. Jazasyn óteýshiler negizinen shartty túrde merziminen buryn bosap shyǵý men óteý jazasyn jeńildeý túrine aýystyrýǵa qatysty suraqtar qoıdy. Qabyldaý barysynda azamattarǵa jazadan bosaýdyń negizdemesi men tártibi jaıly túsiniktemeler berildi.

Oblys prokýrory budan ózge Tólebı aýdanynyń turǵyndarymen de kezdesip, olardyń birqatar problemalarymen tyńdady. Qabyldaýǵa kelgen 9 azamat eldimekenderdi gazben jáne taza aýyz sýmen qamtamasyz etýde týyndaǵan ózekti máselelerdi jetkizdi. Azamattardy qabyldaý aıaqtalǵan soń Nurǵalym Ábdirov atalǵan problemalardy qadaǵalaý organy tarapynan nazarǵa alyp, sheshý joldaryn qarastyratynyn atap ótti.