Túrkistan oblysynyń prokýrory shalǵaıdaǵy aýyl turǵyndarymen kezdesti

TÚRKІSTAN. QazAqparat - Túrkistan oblysynyń prokýrory Nurǵalym Ábdirov shalǵaıdaǵy Sozaq aýdanynyń turǵyndarymen kezdesti. Sapar barysynda prokýror Qyzemshek pen Taýkentte bolyp, óndiristik mekeme basshylarymen de jıyn ótkizdi, dep habarlaıdy QazAqparat tilshisi.

Turǵyndarmen kezdesýge aýdan ákimi Salyhan Polatov pen oblystyń mamandandyrylǵan tabıǵat qorǵaý prokýrory Serik Ábdıev, sondaı-aq kent ákimderi men óndiris oryndary, mekeme basshylary qatysty. Erkin formatta ótken kezdesý barysynda aýyl turǵyndary kókeılerinde júrgen saýaldaryn qoıdy.

Basqosýda kóterilgen máselelerdiń basym kópshiligi - elektr qýatyn esepteý, shalǵaıda jatqan aýyldarǵa dárigerler qajettiligi sóz boldy. Al, Qyzemshek kenti ardagerler keńesiniń tóraǵasy Pernebaı Ótjanov keı jaǵdaıda negizsiz, dálelsiz aryz jazylatynyn tilge tıek etti.

Jıynda sondaı-aq, kámelet jasyna tolmaǵandarǵa qatysty quqyq buzýshylyqty tómendetý, aýdanda oryn alǵan qylmystyń jyldam ashylýymen qamtamasyz etý jaıy aıtyldy. Bul máseleni sheshý aýdandyq polıtsııa bóliminiń bastyǵyna tapsyryldy.

Óz kezeginde Nurǵalym Ábdirov aýdan prokýrory Aıtbolat Dosaevqa turǵyndar tarapynan kóterilgen máseleniń barlyǵyn jeke baqylaýyna alyp, oryndalýyn ózine baıandaýdy júktedi. Óndiris mekeme basshylaryna qaramaǵyndaǵy qyzmetkerlerdiń quqyǵynyń qorǵalýyna basa mán berý kerektigin, ol buzylǵan jaǵdaıda qatań jaza bar ekenin eskertti.