Túrkistan oblysynyń prokýrory maqtaaraldyq turǵyndarmen kezdesti

MAQTAARAL. QazAqparat – Túrkistan oblysynyń prokýrory Nurǵalym Ábdirov pen QR Memlekettik qyzmet isteri agenttiginiń Túrkistan oblysy boıynsha departamenti basshysy, Ádep jónindegi keńes tóraǵasy Bolat Isaqov Maqtaaral aýdanyna jumys saparymen baryp, aýdan turǵyndarymen kezdesti, dep habarlaıdy QazAqparat tilshisi.

Oblystyń prokýrory men departament basshysy Atakent pen Myrzakentte qoǵamdyq qabyldaý ótkizip, jergilikti azamattardyń máselesimen tanysty. Qabyldaýǵa sondaı-aq, oblystyq Polıtsııa departamentiniń basqarma basshysy Baýyrjan Zııataev pen aýdan ákimi Baqyt Asanov, aýdan prokýrory Jumaǵalı Botabekov pen aýdandyq máslıhattyń hatshysy Qadyr Sársekbaev, «Atameken» kásipkerler palatasy aýdandyq fılıalynyń basshysy Nurgúl Ábdirazaqovalar qatysty.

Quzyrly organ basshylaryna jeke máselelerin aıtyp kelgen azamattar negizinen aýyz sý, gaz, jol jáne maqta sharýashylyǵyna qatysty problemalaryn jetkizdi. Aýdannyń áleýmettik-ekonomıkalyq jaǵdaıy týraly máseleler kóterdi. Memlekettik kórsetiletin qyzmetterdiń sapasyn arttyrý men memlekettik qyzmetkerlerge jaǵdaı jasaý jáne sybaılas jemqorlyqtyń aldyn alý boıynsha usynystaryn aıtty.

Jergilikti turǵyndar aýdandaǵy qoǵamdyq-saıası ahýal men áleýmettik máseleler tóńireginde ózderiniń oılarymen bólisti. Óz kezeginde Nurǵalym Ábdirov pen Bolat Isaqov aıtylǵan máselelerdi muqııat tyńdap, árbiri boıynsha zań aıasynda túsindirip berdi. Sondaı-aq, aýdan ákimi Baqyt Asanov baqylaýǵa alǵan máseleler boıynsha da tıisti jumystar júrgiziletinin atap ótti. Qoǵamdyq qabyldaýdan soń basshylar shekaradaǵy «Atameken» kedendik beketine baryp, nysannyń jumys barysymen tanysty.

Búginde kedendik bekettiń aımaǵyn kóriktendirý, kógaldandyrý, keńeıtý jospary júrgizilýde. Atap aıtqanda, shekara mańynan saýda logıstıkalyq ortalyǵyn qurý, onyń ishinde saýda bazarlary, qonaq úı, avtoturaq, qoımalar, turǵyn úıler men túrli sporttyq alańshalardy salý kózdelýde.