Túrkistan oblysynyń prokýrory brakonerlermen kúresti kúsheıtýdi tapsyrdy
Jıynda taıaýda aýdan prokýrory bolyp taǵaıyndalǵan Rýslan Abdraımov aýdandaǵy ózekti máselelerdi sheshýde qabyldaǵan sharalarmen tanystyrdy. Aýdannyń polıtsııa jáne bilim bólimderiniń basshylary da qylmysqa qarsy, onyń ishinde kámelet jasyna tolmaǵandar arasyndaǵy quqyq buzý faktileriniń aldyn alý boıynsha atqarǵan jumysyn baıandady.
Munan soń kezdesýge kelgen 9 azamat prokýrordyń jeke qabyldaýynda boldy. Jergilikti turǵyndar negizinen aýyz sýdyń sapasy, aýdan ortalyǵynyń tabıǵı gazben qamtamasyz etilmeýi, sý qoımasynyń jaǵalaýynda týrızmdi jandandyrý máselelerin sóz etti. Sondaı-aq, sol aımaqty ınfraqurylymmen qamtamasyz etý, az qamtylǵan otbasylarǵa áleýmettik kómek berý, óz betinshe jer qoınaýyn paıdalaný men agroónerkásip keshenin sýbsıdııalaý, kópbalaly otbasylarǵa qaıtarymsyz qaryz berý jaıyn kóterdi.
Oblys prokýrory sonymen qatar oblystyq sottyń tóraǵasy Talǵat Baratbekovpen, sondaı-aq polıtsııa departamenti jáne kásipkerler palatasynyń basshylarymen birlesip, aýdan ortalyǵynda jergilikti aktıvpen kezdesý ótkizdi. Onda kásipkerlik sýbektilerine tıesili jer telimderin memleket paıdasyna qaıtarýdyń sot tájirbıesine qatysty máselemen qatar balyq resýrstaryndaǵy brakonerlik pen mal urlyǵy, jol-kólik oqıǵalary men kámelet jasyna tolmaǵandar arasyndaǵy jáne olarǵa qatysty qylmystardyń aldyn alý jónindegi sharalar talqylandy.
Turǵyndardyń aıtýynsha, brakonerlermen kúres ózekti bolyp otyr. Jyl basynan beri polıtsııa organy bir qylmystyq jáne 43 ákimshilik is qozǵaǵan. Qylmysqa jaýapkershilik baryna qaramastan zańbuzýshylyq sany azaımaýda. Tabıǵat resýrstaryn aınalymǵa túsirý boıynsha brakonerlerdiń zańsyz áreketteri únemi artyp jatyr. Quqyq buzýshylar barlyq shekteý men erejelerdi elemeı, óz isin báseńdetpeı, zańsyz áreketterin jalǵastyrýda. Óz kezeginde oblys prokýrory quzyrly organdardyń profılaktıalyq jumysynyń álsizdiginen joǵaryda atap kórsetilgen qylmys túrleri ósip jatqanyn atap ótti.
Májilisti qorytyndylaǵan oblys prokýrory Nurǵalym Ábdirov aýdan prokýrory Rýslan Abdraımovqa jáne polıtsııaǵa aýdandaǵy zańdylyqty nyǵaıtý jóninde naqty tapsyrmalar berdi.
Sonymen qatar osy aýdannyń laýazym ıelerine túıtkildi máselelerdi sheshý men qylmysqa qarsy kúres júrgizý baǵytyndaǵy profılaktıkalyq jumystardy jandandyrý boıynsha jekelegen usynystar berildi.