Túrkistan oblysynyń prokýratýrasy mektep qyzmetkerlerine qosymsha aqy tóletti
TÚRKІSTAN. QazAqparat - Túrkistan oblysynda mektep qyzmetkerlerine eńbekaqyǵa qosymsha tólemder berilmeı kelgen. Mundaı zańbuzýshylyqtar kezekti prokýrorlyq tekserýler barysynda anyqtaldy, dep habarlaıdy QazAqparat tilshisi.
Oblystyq prokýratýranyń málimetinshe, Saryaǵash aýdanyndaǵy mektepterde ot jaǵatyn 92 jumysshyǵa 6 mln teńge kóleminde qosymsha aqy tólenbegen. Bul qarajat qyzmetkerlerdiń zııandy jumystarmen aınalysqany úshin berilýi tıis bolǵan. Aýdan prokýrorynyń usynysymen ot jaǵýshylardyń eńbekaqylary qaıta eseptelip, paıda bolǵan bereshek tolyǵymen óteldi.
Sondaı-aq Arys aýdanyndaǵy balabaqshalarda da osyndaı zańbushylyqtar tirkelgen. Onda 601 qyzmetkerge jazataıym oqıǵalardan mindetti saqtandyrý sharttary jasalmaı kelgeni anyqtaldy. Eńbek kodeksiniń (23-baby 2-tarmaǵynyń 15-tarmaqshasy) talaptaryn buzǵandarǵa shara qoldaný úshin aýdan prokýratýrasy Túrkistan oblysynyń eńbek ınspektsııasy jónindegi basqarmasyna usynys engizdi. Búgingi kúni prokýrorlyq akti negizinde aýdandaǵy balabaqsha qyzmetkerleri jazataıym oqıǵalardan tolyǵymen saqtandyrylyp, zań talaptaryn buzýǵa jol bergen balabaqsha basshylary Ákimshilik quqyqbuzýshylyq týraly kodekstiń 230-babynyń 2-tarmaǵymen jaýapqa tartyldy.
