Túrkistan oblysynyń polıtseıleri jol apatyna ushyraǵan qyrǵyzstandyq júrgizýshige kómektesti
TÚRKІSTAN. QazAqparat - Polıtseıler jol apatyna ushyraǵan qyrǵyzstandyq júrgizýshige kómektesti, dep habarlaıdy QazAqparat Túrkistan oblysy PD-niń baspasóz qyzmetine silteme jasap.
12 qańtarda shamamen keshki saǵat 22.30-da, Báıdibek aýdany aýmaǵyndaǵy Shymkent-Samara tas jolynyń 56 shaqyrymynda «Volvo» markaly aýyr júk kóliginiń júrgizýshisi rýldi basqara almaı, aýdarylyp ketken.
Oqıǵa ornyna jetken Báıdibek APB-niń polıtseıleri sheteldikke avtokólikti qaıta turǵyzýǵa kómektesip, ony aıyppul turaǵyna jetkizdi. Kókónister tıelgen bul avtokóliktiń Qyrǵyzstan Respýblıkasynan Reseı Federatsııasyna qaraı baǵyt alǵany anyqtaldy. Jol apaty saldarynan qaza bolǵandar men zardap shekkender joq. Júrgizýshige tıisti medıtsınalyq
kómek kórsetildi.
Er adam, ıaǵnı Qyrǵyzstan azamatyna qatysty polıtsııa qyzmetkerleri QR ÁQBtK-niń 610-baby «Kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy» boıynsha ákimshilik hattama toltyrdy. Osy jaıt boıynsha jınalǵan materıaldar tıisti sheshim qabyldaý úshin sotqa jiberiletin bolady.
Qyrǵyzstan Respýblıkasynyń azamaty polıtseılerdiń kórsetken kómegine óz rızashylyǵyn jetkizdi: «Túngi ýaqytta trassada meniń kóligim aýdarylyp ketti. Sol sátte der kezinde kómekke kelip, meni qutqaryp qalǵan polıtseılerge alǵys aıtamyn. Meni tamaqtandyrdy, medıtsınalyq kómek te kórsetildi. Aýdarylǵan kóligimdi qaıtadan turǵyzyp berdi. Polıtseılerge úlken raqmet!», - deıdi ol.
