Túrkistan oblysynyń polıtseıleri jasóspirimderge ekskýrsııa uıymdastyrdy
TÚRKІSTAN. QazAqparat - Túrkistan oblysy, Keles aýdanynyń ıývenaldy polıtsııa qyzmetkerleri jasóspirimderge «Qylmystyq jaýapkershilik» atty tanymdyq ekskýrsııa uıymdastyrdy. Jastar arasyndaǵy qylmystar men quqyqbuzýshylyq áreketterdiń aldyn alý maqsatynda uıymdastyrylǵan sharada profılaktıkalyq esepte turatyn 21 jasóspirim tártip saqshylarynyń jumys ornyn aralap kórdi, dep habarlaıdy QazAqparat tilshisi.
Jasóspirimder kórshiles aýdanda ornalasqan ýaqytsha ustaý ızolıatorymen, krımınalıster jáne basqa da polıtsııa qyzmetkerleriniń qyzmettik bólmelerimen tanysty. Kúndelikti jumystaryn kórip, qylmyskerlerdi quryqtaý kezinde bolatyn is-áreketter, qylmystyq jaýapkershilikke tartylý jáne Qylmystyq kodekste qarastyrylǵan taǵy da basqa baptar týraly mańyzdy maǵlumattar aldy.
Qamaýdaǵy qylmyskerdiń shynaıy ómirin jasóspirimderge kórsetý arqyly olardyń bolashaqta zań buzýǵa degen qulshynysyn joıýǵa bolady deıdi polıtseıler. Sebebi, mundaı sıpattaǵy ekskýrsııalar endi ǵana úlken ómirge aıaq basyp kele jatqan jastardyń jaman jolǵa túsýine jol bermeı, toqtaý salýy ǵajap emes. Polıtseıler tarapynan arnaıy jasóspirimder úshin uıymdastyrylǵan saıahatqa qatysqan jastar polıtsııa qyzmetkerlerine ózderin qyzyqtyryp júrgen suraqtaryn qoıyp, tıisti jaýap aldy.
Ekskýrsııa sońynda polıtsııa bólimin aralap, tynys-tirshiligimen tanysqan jasóspirimderdi Keles APB qyzmetkerleri aldaǵy ýaqytta zańdy saqtap, jol erejesin buzbaýǵa shaqyrdy.
