Túrkistan oblysynyń polıtseıleri saýda oryndaryn jappaı tekserýde
TÚRKІSTAN. QazAqparat - Bıylǵy jyldyń 4-shi mamyrynan bastap Túrkistan oblystyq Polıtsııa departamentiniń Ekstremızmge qarsy is-qımyl basqarmasy men №6506 áskerı bóliminiń arnaıy jasaq qyzmetkerleri birlesip, aýqymdy jedel sharalar atqardy, dep habarlaıdy Túrkistan oblysy Polıtsııa departamentiniń baspasóz qyzmeti.
Baspasóz málimetterine qaraǵanda atalmysh sharalar QR Іshki ister mınıstrliginiń polıtseılerge júktegen jedel-profılaktıkalyq is-sharalarynyń aıasynda júzege asyrylǵan.
Naqtyraq aıtqanda, oblysta Túrkistan, Saryaǵash, Saıram, Jetisaı sekildi birqatar qala, aýdandarynda jedeldetilgen profılaktıkalyq is-sharalar kesheni júrgizildi.
Máselen, Túrkistan qalasynda ornalasqan bazarlardyń birinen uıaly telefondardy alyp satý jáne jóndeý jumystarymen aınalysatyn azamattardyń arasynda dástúrli emes destrýktıvtik dinı aǵymdy ustanýshylary men olardyń jaqtastary bar ekendigi belgili boldy.
Tyńǵylyqty tekserý nátıjesi kórsetkendeı, kúdiktiler qylmystyq jolmen urlanǵan uıaly telefondardy alyp satý, áleýmettik, ulttyq, násildik nemese dinı alaýyzdyqty qozdyrý is-áreketterin iske asyrý arqyly, uıaly telefonǵa arnaıy destrýktıvtik aǵymdy nasıhattaıtyn málimetterdi júkteı otyryp, tutynýshylardy arandatqan.
Bul isti polıtseıler QR Qylmystyq kodekstiń 174-baby «Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý» boıynsha arnaıy tirkeýge aldy.
Qazirgi tańda tártip saqshylary kúdikti retinde ustalǵan úsh azamatqa qatysty tergep-tekserý amaldaryn júrgizip, ýaqytsha qamaýǵa aldy. Aıǵaq zattar tárkilenip, saraptamalar taǵaıyndaldy. Oblys polıtseıleri sotqa deıingi tergep-tekserý jumystaryn júrgizýde. Bul is aıaqtalǵan soń, jınaqtalǵan barlyq materıaldar naqty sheshim shyǵarý úshin sotqa joldanady.
