Túrkistan oblysynyń polıtseıleri ózine qol salmaq bolǵan turǵyndy qutqaryp qaldy

TÚRKІSTAN. QazAqparat - Túrkistan oblysynyń polıtseıleri ózine qol salmaq bolǵan turǵyndy qutqaryp qaldy, dep habarlaıdy QazAqparat tilshisi.

Oqıǵa Ordabasy aýdanynda bolǵan. Jedel shaqyrtý boıynsha oqıǵa ornyna barǵan ýchaskelik polıtsııa ınspektory Nurıslam Syrmanuly men taǵylymdamadan ótýshi Joldas Orazhan saraıdyń ishinde jipke asylyp turǵan er adamnyń ómirin qutqaryp qaldy.

«Erli zaıyptylar arasynda bolǵan janjaldan soń, joldasy úıden shyǵyp ketken. Aýlany túgel qarap shyqqan polıtseıler, saraıdyń ishine kirgende, jipke asylyp turǵan úı ıesin kóredi. Birden sózge aınaldyryp kelip, denesinen qushaqtap kóterip alǵan. Sol sátte baılaýly turǵan arqandy da kesip úlgergen. Erli-zaıyptylar polıtsııa bólimine jetkizilip, profılaktıkalyq túsindirý jumystary júrgizildi» - delingen Túrkistan oblysy polıtsııa departamentiniń baspasóz qyzmeti taratqan habarlamada.