Túrkistan oblysynyń polıtseıleri qarý jáne oq-dári jasaǵandardy tutqyndady
TÚRKІSTAN. QazAqparat - Túrkistan oblysy Tóle bı aýdanynyń polıtsııa bólimine atys qarýy men oq-dári jasaýmen aınalysatyn áldekimder bar ekendigi týraly habarlama kelip tústi.
Kórsetilgen mekenjaıǵa polıtsııa qyzmetkerleri birden baryp, jedel izdestirý sharasy barysynda Tóle bı aýdanynyń eki turǵynyn qolǵa túsirdi, dep habarlaıdy QazAqparat Túrkistan oblystyq Polıtsııa departamentiniń baspasóz qyzmetine silteme jasap.
Ustalǵan bir kúdiktiniń úıin tintý barysynda tapanshaǵa uqsas qoldan jasalǵan eki qarý jáne shamamen 70-ten oq tabylyp, tárkilendi.
Bolǵan oqıǵa QR QK 287-baby «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» jáne «Qarýdy zańsyz jasaý» 288-babymen sotqa deıingi tergeýdiń biryńǵaı tizilimine tirkeldi. Kúdiktiler qamaýǵa alyndy. Sotqa deıingi tergeý amaldary júrgizilýde.
Qazirgi tańda kúdiktilerdiń atys qarýyn zańsyz jasaýmen aınalysý jáne saqtaý maqsattary anyqtalýda. Polıtseıler kúdiktilerdiń daıyndalǵan qarý-jaraq pen oq-dárilerdi satyp alý múmkindigin joqqa shyǵarmaıdy.
