Túrkistan oblysynyń polıtseıleri gaz quıý beketin tonaǵan qylmystyq topty ustady
NUR-SULTAN. QazAqparat – Keles aýdanynda gaz quıý beketin tonaǵan kúdiktiler qolǵa tústi, dep habarlaıdy QazAqparat Túrkistan oblysy PD baspasóz qyzmetine silteme jasap.
Keles APB-ne aýdanǵa qarasty aýyldyń birinde ornalasqan gaz quıý beketinde jumys isteıtin jergilikti turǵyn aryzdanady. Ol tasjol boıyndaǵy gaz quıý beketinde tańǵy 04:00-der shamasynda jumysta otyrǵan kezinde belgisiz azamattar kelip, gaz quıyp berýge shyǵýyn ótingen. Jábirlenýshi azamattyń aıtýynsha, ol shyqqan sátte, álgi jigitterdiń biri basynan belgisiz zatpen uryp, qulatady. Kelesi bireýi kassadaǵy aqshany berýdi talap etedi. Alaıda kassada aqsha joqtyǵyn kórgen kúdiktiler, jábirlenýshiniń qaltasyndaǵy quny 70 000 teńge turatyn uıaly telefonyn tartyp alyp, kelgen kólikterine minip, Jetisaı aýdany baǵytyna ketip qalǵan.
Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 192-baby «Qaraqshylyq» boıynsha tirkeldi.
Oqıǵa ornyna jyldam jetken polıtseıler kúsh qoldaný arqyly shabýyl jasalǵanyn anyqtady. Jedel-izdestirý jumystary nátıjesinde beınebaqylaý kamerasyna túsip qalǵan kúdiktilerdiń kóligin anyqtalyp, osy iske qatysty 4 kúdikti Shymkent qalasynda ustaldy. Olar sol qalanyń turǵyndary bolyp shyqty. Kúdiktilerden jábirlenýshiniń uıaly telefony aıǵaqzat retinde alynyp, zańdy ıesine qaıtaryldy.
Tergeý barysynda kúdiktiler gaz quıý beketin tonaǵannan jarty saǵat buryn 30 shaqyrym qashyqtyqta ornalasqan janar-jaǵar maı beketinen janarmaı toltyryp quıdyryp alyp, aqshasyn tólemeı ketkeni belgili boldy. Odan bólek Shymkent qalasyndaǵy osyndaı qylmystarǵa qatysa bar-joǵy anyqtalýda. Qazirgi tańda sotqa deıingi tergeý amaldary júrgizilýde.
