Túrkistan oblysynyń polıtseıleri 3 ret sotty bolǵan páter urysyn ustady
NUR-SULTAN. QazAqparat – Túrkistan oblysynda 3 ret páter urlyǵy jáne 1 ret tonaý boıynsha sotty bolǵan ákki ury taǵy da qylmys jasap, qolǵa tústi, dep habarlaıdy oblystyq PD baspasóz qyzmeti.
Ordabasy Aýdandyq polıtsııa bólimine jergilikti turǵyn habarlasyp, belgisiz bileýler onyń úıinen áshekeı buıym men noýtbýgyn urlap ketkenin jetkizedi. APB qyzmetkerleri atalǵan jaıtty QR Qylmystyq kodeksiniń 188-baby «Urlyq» boıynsha tirkeýge alyp, is qozǵaıdy. Jábirlenýshige keltirilgen shyǵyn 245 000 teńge.
Turǵynúıge urlyqqa túsýshilerdi anyqtaý, qylmysty ashý maqsatynda tájirıbeli de bilikti polıtseılerden arnaıy top quryldy. Olar jedel-izdestirý sharalaryn júrgizip, jaqyn mańdaǵy beınebaqylaý kameralary arqyly kúdiktiniń izine túsedi. ıAǵnı, kúdikti óz týysynyń úıine qonaqqa kelgen shardaralyq turǵyn bolyp shyǵady. Osylaısha kúdiktiniń jeke basy, 3 ret páter urlyǵy jáne 1 ret tonaý boıynsha sotty bolǵandyǵy da anyqtaldy. Polıtseılerdiń qyraǵylyǵynyń arqasynda qylmys der kezinde ashyldy.
Belgili bolǵandaı, kúdikti tańerteńgi ýaqytta úı ıesiniń joqtyǵyn paıdalanyp, urlyqqa túsken. Qazirgi tańda ol qamaýda. Tergep-tekserý amaldary júrgizilýde. Tártip saqshylarynyń aıtýynsha, onyń basqa da qylmystyq isterge qatysy bolýy múmkin.
Túrkistan oblysy polıtseıleri azamattarǵa urylardan saq bolyp, turǵyn-úılerińizge beınebaqylaý kameralary men dabylqaqqyshtardy ornatýǵa keńes beredi.
Sonymen qatar, urylardyń jolyn kesý maqsatynda esikke myqty qulyptar, terezege temir tor ornatý keregin eskertedi.
