Túrkistan oblysynyń polıtseıleri 16 páterdi úptep ketken qylmystyq topty ustady
TÚRKІSTAN. QazAqparat - Ordabasy APB-ne jergilikti turǵyn kúndizgi ýaqytta belgisiz bireýler úıine kirip, 700 myń teńgeni quraıtyn altyn buıymdary men teledıdaryn jymqyryp ketkenine baılanysty aryzdanǵan. Budan bólek bir aptanyń ishinde osyndaı páter urlyqtaryna baılanysty 4 jábirlenýshi shaǵym túsirgen, dep habarlaıdy QazAqparat oblystyq PD-niń baspasóz qyzmetine silteme jasap
.
Oryn alǵan urlyq jaıty boıynsha aýdandyq polıtseıler shuǵyl iske kiristi. Oqıǵa ornyn muqııat tekserip, jaqyn aımaqtardy aralap shyǵyp, kýágerlerden surastyrdy. Tártip saqshylarynyń nátıjeli jedel-izdestirý sharalarynyń arqasynda aqparat kózderi men beınebaqylaý kamerasyna túsip qalǵan kúdiktilerdiń beınesi arqyly urylardyń jeke bastary anyqtaldy. Osylaısha, kúdiktiler Shymkent qalasyndaǵy kóshelerdiń birinen ustaldy. Tergeý barysynda olardyń úsheýi de Shymkent qalasynyń turǵyny ekeni belgili boldy. Jáne kúdiktiniń ekeýi buryn dál osy «Urlyq» babymen sotty bolǵan. Olardyń Ordabasy aýdanynda bir apta ishinde jasalǵan basqa 4 páter urlyǵyna qatysty ekendigi belgili boldy. Polıtseılerdiń anyqtaýynsha, kúdiktiler kúndizgi ýaqytta, úı ıeleri jumysta bolǵanyn paıdalanyp, plastık terezelerin buraǵyshtarmen ashý arqyly urlyq jasap otyrǵan. Odan bólek, ustalǵan qylmystyq top oblys boıynsha 16 páter urlyǵyn jasaǵany anyqtaldy. Qazirgi tańda atalǵan derekter boıynsha sotqa deıingi tergeý amaldary júrgizilýde. Kúdiktiler qamaýǵa alyndy. Baýkespeler jábirlenýshilerdiń úıinen urlanǵan altyn buıymdardy alypsatarlarǵa, bazarlarǵa jáne lombardtarǵa ótkizip, aqshasyn óz qajetilikterine jaratyp otyrǵan. Sondaı-aq keıbir jábirlenýshilerdiń urlanǵan zattary tabylyp, aıǵaqty zat retinde alynyp, zańdy ıelerine qaıtaryldy.