Túrkistan oblysynyń ormandy alqaby keler jyly 3 myń gektarǵa keńeıedi - ákim
TÚRKІSTAN. QazAqparat – Qazaqstanda naýryz merekesi qarsańynda «Taza tabıǵat» ekologııalyq jobasy bastaldy. Jalpyulttyq joba Túrkistan qalasynda bastaý alyp, Qazaqstannyń ózge de óńirlerinde jalǵasty, dep habarlaıdy QazAqparat tilshisi.
Elimizdiń Ekologııa, geologııa jáne tabıǵı resýrstar mınıstrligi men oblystyq ákimdikterdiń birlesken sharasynda birneshe aımaqta aǵash otyrǵyzý, aınalany qoqystan tazartý, sý kózderin ashý aktsııalary ótti. Osylaısha Prezıdenttiń orman alqaptarynda 2 mlrd, eldi mekenderde 15 mln aǵash otyrǵyzý týraly tapsyrmasyn oryndaý bastaldy. «Mekenim – jasyl elim» aktsııasyna 60 myń adam atsalysyp, 486 myń túp aǵash otyrǵyzyldy. Oqýshylardyń «Meniń aǵashym» chellendjine 31 myń adam qatysyp, 39 myń kóshet egildi.
«Memleket basshysy Qasym-Jomart Toqaev halyqqa Joldaýynda qorshaǵan orta ahýalyn jaqsartý baǵytynda tapsyrmalar berdi. Jalpyulttyq ekologııalyq sharalar «Nur Otan» partııasynyń saılaýaldy baǵdarlamasynda, el Táýelsizdiginiń 30 jyldyǵy aıasynda da qarastyrylǵan. Ózge óńirlerde de osyndaı sharalar aýa raıyna baılanysty sáýirde ótedi», - dedi mınıstr Maǵzum Myrzaǵalıev Túrkistandaǵy sharadaǵy sózinde.
Túrkistandaǵy aktsııa aıasynda qala irgesinde qurylyp jatqan Jasyl beldeýge kóp jyldyq aǵash kóshetteri de egildi.
«Oblysymyz boıynsha 3 mln 131 myń ga orman qory jerleri bar, onyń ishinde ormanmen kómkerilgen alqaby 1 mln 630 myń gektardy quraıdy. Túrkistan irgesindegi Jasyl beldeý aýmaǵyn keler jylǵa deıin taǵy 3000 gektarǵa keńeıtip, tolyq aıaqtaý jospary bar. Al, orman tuqymbaqtaryn damytý úshin onda ár jyly 35-40 mln ártúrli aǵash kóshetin ósiremiz», – dep atap ótti oblys ákimi Ómirzaq Shókeev.
Shara barysynda ardagerlerdiń, otandyq jáne Túrkistan halyqaralyq medıaforýmyna jınalǵan túrkitildes elder BAQ ókilderiniń qatysýymen Qoja Ahmet ıAssaýı kesenesi mańyndaǵy Botanıkalyq baqqa da aǵash otyrǵyzyldy. Jańa áýejaı jolyndaǵy jemis baýyna órik egildi. Saıabaqtar, alleıalar abattandyrylyp, senbilik uıymdastyryldy. Maǵzum Myrzaǵalıev «Taza tabıǵat» aktsııasynyń naýryz merekesinde, Túrkistanda ótkizilýiniń erekshe máni bar ekenin jáne jobany dástúrge aınaldyrý qajettigin aıtty.
