Túrkistan oblysynyń Ordabasy aýdanynda tropıkalyq jemister ósirilýde
ORDABASY. QazAqparat – Túrkistan oblysy, Ordabasy aýdanynyń «Elnur-Aıdar» óndiris kooperatıvi tropıkalyq jemister men alma baǵyn ósirýmen aınalysyp keledi.
Qajymuqan aýyldyq okrýginen úsh jyl buryn ashylǵan seriktestiktiń baǵbandary anar men alma, 0,5 gektarǵa lımon ekken, dep habarlaıdy QazAqparat tilshisi.
Qojalyqtyń is júrgizýshisi Elnur Seıdazımov búgingi tańda 1000 túp anar, 6000 túp alma, 707 kóshet lımon ósirip otyr. Lımonnyń ózinen bıyl 20 tonna ónim alý josparlanǵan. Ótken jyly 1 jyldyq kóshettiń ózinen 4 tonnaǵa jýyq ónim alynǵan. Kooperatıvte 7 adam turaqty jumyspen qamtylyp otyr. Sonymen qatar, aýdanda qarqyndy baq kólemi artyp keledi. Qazirgi tańda aımaqta 400 gektarǵa jýyq baq bar. Qajymuqan aýyl okrýgindegi «KazGarden» JShS-i jalpy quny 2 mlrd teńgege 240 gektarǵa baq egýdi qolǵa alǵan.
Alma men súıekti jemis-jıdek ósirip otyrǵan qojalyqta 4 adam turaqty, 55 adam maýsymdyq jumyspen qamtylǵan. Ordabasy aýdany negizinen agrarly óńir bolǵandyqtan munda egin jáne mal sharýashylyǵy damyǵan. Máselen, Bórjar aýylyndaǵy «Sabyr» sharýa qojalyǵy iri qara mal men asyl tuqymdy qoı ósirýmen aınalysady. 2005 jyly qurylǵan qojalyqta qazirgi tańda 8383 bas ýaq mal bar. Onyń taza tuqymdysy 4640 basty quraıdy. Sharýashylyqta 22 jergilikti turǵyn jumys isteıdi. Qojalyq ıesi Talǵat Janysbaev osylaısha sharýashylyǵyn sút jáne et baǵytynda damytyp otyr.
