Túrkistan oblysynyń óndiris oshaqtarynda 5 jazataıym oqıǵa boldy
TÚRKІSTAN. QazAqparat - Jyl basynan beri Túrkistan oblysynda óndiriste 5 jazataıym oqıǵa tirkeldi. Zardap shekken jumysshylardyń barlyǵy derlik aýyr jaraqat alǵan, dep habarlaıdy QazAqparat tilshisi.
Bul týraly «Shymkent qalasy kásipodaqtar ortalyǵy» aýmaqtyq kásipodaqtar birlestigi men Kásipodaqtar federatsııasynyń oqý ortalyǵy ótkizgen semınar barysynda aıtyldy.
Basqosýda atalǵan oqıǵalar Maqtaaral, Jetisaı, Keles, Saıram aýdandarynda oryn alǵany sóz boldy. Eńbekti qorǵaý jáne tehnıka qaýipsizdigin saqtaý taqyrybynda ótken sharada jazataıym oqıǵalardy tómendetý joldary qarastyryldy. Kásipodaq ókilderi óndiristik jazataıym oqıǵalardy boldyrmaý úshin eń aldymen kásiporyndar men uıymdarda jumyskerlerge eńbek qaýipsizdigin saqtaý men eńbekti qorǵaýǵa baǵyttalǵan oqytý jumystaryn uıymdastyrý qajet dep esepteıdi. Sala mamandarynyń pikirinshe, mundaı sharalar ásirese jaısyz jaǵdaılar tirkelgen mekemelerde shuǵyl túrde uıymdastyrylýy qajet.
Aıta keteıik, byltyr Túrkistan oblysy men Shymkent qalasynda óndiristik jazataıym oqıǵalar sany - 52-ge jetken. Zardap shekkender sany - 63 adam bolsa, onyń 11-i qaıtys bolǵan. Sondaı-aq bir jyl ishinde óńirde jumysshylar tobynyń 6 jazataıym oqıǵasy oryn aldy. Jaısyz jaǵdaılarda 17 adam zardap shekken bolsa, bireýi oqıǵa ornynda kóz jumdy. Taǵy 16 jumysshy túrli dene jaraqatyn alǵan. Bul derekter Báıdibek, Maqtaral, Jetisaı, Ordabasy, Saıram, Sozaq, Saryaǵash, Tólebı, Túlkibas aýdandary men Túrkistan, Kentaý qalalarynda tirkelgen. Sol sııaqty toptyq jazataıym oqıǵalar Saıram, Saryaǵash aýdandary men Kentaý, Túrkistan qalalarynda tirkelgen.
