Túrkistan oblysynyń oqýshylary ǵylymı jobalar baıqaýynda top jardy
TÚRKІSTAN. QazAqparat - Túrkistan oblysy oqýshylarynyń eńbegi respýblıkalyq ǵylymı jobalar saıysynyń qorytyndysy boıynsha úzdik úshtikke endi, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Túrkistan, Almaty men Pavlodar oblystarymen birge bilim salasy boıynsha alǵashqy úshtik qataryn tolyqtyrdy. Bilim dodasynda Túrkistan oblysynyń 46 oqýshysy baq synap, 22-si júlde aldy.
Jalpy bilim beretin pánder boıynsha respýblıkalyq ǵylymı jobalar konkýrsy Almaty qalasyndaǵy ál-Farabı atyndaǵy Qazaq Ulttyq ýnıversıtetinde ótken. Myńǵa jýyq oqýshy qatysqan respýblıkalyq saıystyń irikteý kezeńinen 625 joba ótti. Eń úzdik dep tanylǵan ǵylymı jumystar aqtyq synǵa joldama aldy.
Jas daryn ıeleriniń bilimi tarazyǵa salynǵan saıysta Túrkistan oblysynyń oqýshylary 3 altyn, 7 kúmis, 12 qola medal jeńip aldy. Ǵylymı jobanyń qorytyndysy boıynsha Jetisaı aýdanyndaǵy «Daryn» mamandandyrylǵan mektep-ınternatynyń 11 synyp oqýshylary Bolat Mahanbetov pen Danııal Tursynmurat jáne Saryaǵash aýdany №4 mamandandyrylǵan mektep-ınternatynyń 10-shy synyp oqýshysy Baǵıla Anarbek Altyn medal ıegerleri atandy.
Olar qoqys óńdeý ónerkásibin damytý joldary boıynsha ǵylymı eńbekterimen ozyq shyqty jáne sal-seriler poezııasyndaǵy qyz ben jigit sıpatyn berýdegi kórkemdik tásilderdiń qoldanylý ereksheligi taqyryptarynda jumystaryn qorǵap shyqty.
Al, kúmis medaldy Kentaý qalasyndaǵy mamandandyrylǵan «Daryn» mektep-ınternatynyń shákirtteri jeńip aldy. Dál osy bilim uıasy men Kentaý qalasy, «Shornaq» jalpy orta mektebiniń jáne Qazyǵurt aýdany, №5 J.Kapparov atyndaǵy mamandandyrylǵan fızıka-matematıkalyq mektep-ınternaty jáne Túrkistan qalasy, N.Ońdasynov atyndaǵy Túrkistan mamandandyrylǵan mektep-ınternatynyń shákirtteri qola júlde ıemdendi.
Mektep oqýshylaryna arnalǵan saıys osymen 21-ret uıymdastyrylyp otyr. «Daryn» respýblıkalyq ǵylymı-tájirıbelik ortalyǵy uıymdastyrǵan jas ǵalymdar básekesi bıyl erekshe formatta ótken. Ashyqtyq pen aıqyndylyqty qamtamasyz etý maqsatynda baıqaý onlaın-rejımde ótti.
