Túrkistan oblysynyń medıtsınalyq mekemeleri bir aıda kompıýtermen tolyq qamtylady

TÚRKІSTAN. QazAqparat -  Túrkistan oblysynyń emdeý mekemeleri bir  aıdyń ishinde kompıýtermen tolyq qamtamasyz etiledi. Keshendi medıtsınalyq aqparattyq júıeler dárigerlerdiń jumysyn edáýir jeńildetip, «bir tereze» prıntsıpinde jumys isteýge múmkindik bermek, dep habarlaıdy QazAqparat tilshisi.

Oblystyq Densaýlyq saqtaý basqarmasynyń málimetinshe, búginde zamanaýı qondyrǵylar Tóle bı, Arys aýdandaryndaǵy emdeý oryndary  men Túrkistan qalalyq ortalyq balalar aýrýhanasyna jetkizilgen. Medıtsınalyq mekemelerdiń  árqaısysyna 190 kompıýterden berildi. Osylaısha, óńirdegi aýrýhanalar men emhanalardy qosa eseptegende, barlyq medıtsınalyq pýnktter men feldsherlik-akýsherlik pýnktter kompıýtermen tolyq jabdyqtaldy. Aldaǵy bir aıdyń ishinde mundaı tehnıkamen Túrkistan oblysynyń aýdan jáne aýyldyq jerlerinde ornalasqan barlyq medıtsınalyq mekemeleri qamtylady. Jańa tehnologııalar arqyly oblystaǵy árbir turǵynnyń elektrondyq densaýlyq pasporty bolady. Al keler jyldan bastap nárestelerdiń týǵannan bergi barlyq málimetteri osy densaýlyq pasportyna jazylyp turady.  
   

Aıta keteıik, óńirdegi densaýlyq saqtaý salasynyń sandyq júıege kóshý jumysy tórt baǵytta júzege asýda. Olar - emdeý jáne aldyn alý, aýrýdy erte anyqtaý, medıtsınalyq kómek kórsetý, aýrýdy basqarý ári ońaltý. Búginde oblystaǵy medıtsınalyq mekemelerde  kompıýtermen qamtamasyz etý deńgeıi 69 paıyzdy qurap otyr. Óńirdegi aýdan ortalyqtary men qalalar tolyqtaı  ınternet júıesine qosylǵan. Shalǵaı aýmaqtarda ornalasqan eldimekenderdi ǵalamtorǵa qosý  2021 jylǵa deıin josparlanǵan. Al 38 emdeý mekemesi medıtsınalyq aqparattyq júıege qosylǵan.